[b]Lökbatan vulkanı niyə püskürüb?[/b] - İLKİN SƏBƏB

Lökbatan vulkanı sonuncu dəfə 2012-ci ildə püskürüb və ən aktiv vulkan sayılır.

Azərbaycan Milli Elmlər Akademiyasının (AMEA) Geologiya İnstitutunun Palçıq vulkanizmi şöbəsinin müdiri Adil Əliyev Lent.az-a bildirib ki, həmin palçıq vulkanı son 200 ildə 25-ci dəfədir püskürür: “ Palçıq vulkanına yaxın ərazidə yaşayış məntəqələri olsa da onlar üçün təhlükə yoxdur. Vulkan səhər tezdən 8-ə qalmış bir dəfə püskürüb. Zəif püskürmə olub”.

A.Əliyev vulkan püskürməsinin ehtimal edilən səbəbini də açıqlayıb: “ Lökbatan vulkanı yaxınlığında zəlzələ yataqları var. Çox güman ki, orda baş verən seysmik hadisə vulkanı oyadıb. Amma tədqiqatlardan sonra daha dəqiq səbəbi ortaya çıxacaq. Araşdırma aparmaq lazımdır. Hazırda ərazidə duru palçıq olduğundan işləmək mümkün deyil. Palçığın qurumasını gözləyirik ki, tədqiqatlar aparaq. Planlama işləri yekunlaşsın, vulkanın nə qədər ərazini əhatə etdiyi, həcmi, qalınlığı, hansı süxurları tulladığı barədə məlumat veriləcək”.

A.Əliyev əlavə edib ki, vulkan bu gün yenə oyanmasa, yenidən püskürmə ehtimalı yoxdur.

****

11:13

Azərbaycan Milli Elmlər Akademiyasının (AMEA) Geologiya İnstitutunun Palçıq vulkanizmi şöbəsinin əməkdaşları Lökbatan palçıq vulkanının püskürdüyü əraziyə baxış üçün yollanıb.

Şöbənin müdiri Adil Əliyev Lent.az-a bildirib ki, püskürən vulkanla bağlı AMEA Geologiya və Geofizika İnstitutunun mütəxəssisləri tərəfindən araşdırma aparılacaq. Ondan sonra vulkanın püskürmə səbəbi bəlli olacaq.

***

10:53

Mayın 2-də səhər saat 8 radələrində Bakı şəhərindən 15 km cənub-şərq istiqamətində, Xəzər dənizinin sahilində, neft-mədən sahəsində yerləşən Lökbatan palçıq vulkanında püskürmə baş verib.

Ekologiya və Təbii Sərvətlər Nazirliyindən Lent.az-a verilən məlumata görə, sözügedən palçıq vulkanı Bakı və Abşeron yarımadasının palçıq vulkanları qrupu Dövlət Təbiət Qoruğuna aid deyil.

Hazırda vulkan aktivliyi baş vermiş ərazidə qoruq əməkdaşlarından təşkil edilmiş operativ qrup tərəfindən müşahidələr aparılır.

Xatırladaq ki, 1810-cu ildə qeydə alınmış Lökbatan palçıq vulkanı dünyanın ən aktiv 5 vulkanından biri olmaqla püskürməsinə görə dünya rekordçusudur və vulkanın hazırkı püskürməsi sayca 25-cidir.