İqtisad Universitetində “Açıq qapı” günü keçirilib

Azərbaycan Dövlət İqtisad Universitetində “Açıq qapı” günü keçirilib. Ali təhsil ocağının rektoru, professor Ədalət Muradovun iştirakı ilə keçirilən “Açıq qapı”da vətəndaşların şikayət və təklifləri dinlənilib. Bu barədə Lent.az-a ali məktəbdən məlumat verilib.

Vətəndaşlar əsasən övladlarının digər universitetlərdən ADİU-ya köçürülməsi ilə bağlı müraciətlər ediblər. “Açıq qapı” günündə həmçinin, universitetdə pedaqoq kimi fəaliyyət göstərmək istəyənlər də rektorun qəbulunda olublar. Rektor Ədalət Muradov bütün müraciətlərin nəzərə alınacağını bildirib.

ADİU-da “Açıq qapı”günü hər ayın birinci şənbə günü keçirilir.