Nazirlik ağackəsmə ilə bağlı şikayəti yerindəcə araşdırıb

Bakı şəhəri Binəqədi rayon sakini İsmayıl Əliyev Binəqədi rayonu, S.S.Axundov küçəsi, 3a və 3b saylı yaşayış binalarının ətrafında tikinti işləri ilə əlaqədar ağacların kəsilmə təhlükəsinin olması barədə Birinci Vitse-Prezidentin Katibliyinə şikayət məktubu ilə müraciət edib.

Ekologiya və Təbii Sərvətlər Nazirliyinin mətbuat xidmətindən Lent.az-a verilən məlumata görə, həmin şikayətçinin iştirakı ilə yerində araşdırma aparılıb.

Əraziyə keçirilən baxış zamanı sözügedən ünvandakı yaşıllıq sahəsində 6-60 sm diametrliyində yaşköküstə müxtəlif cinsli (çinar, tut, palıd, sərv, armud, heyva, gilas, alça) 23 ədəd ağacın və 70 ədəd müxtəlif cinsli kol bitkisinin olduğu müəyyən edilib. Yaşıllıq sahəsində qanunsuz ağac kəsilməsi və zədələnməsi, həmçinin tikinti işlərinin aparılması halları aşkar edilməyib.

Ağac və kol bitkiləri qeydiyyata alınaraq, yaşıllıqların mühafizə olunması ilə bağlı aidiyyəti qurumlar qarşısında məsələ qaldırılıb. Ərazi nəzarətə götürülüb.