Donetskdə separatçılar prokurorluq binasını ələ keçiriblər, çoxlu yaralı var

Ukraynanın şərqindəki Donetsk şəhərində separatçılar prokurorluq binasını ələ keçiriblər.

APA TV-nin xəbərinə görə, 1 May - Zəhmətkeşlər gününü qeyd etmək üçün Lenin meydanına toplaşan rusiyameyllilər daha sonra prokurorluq binasına yürüş ediblər. Binanın qarşısına xeyli sayda polis əməkdaşı cəlb edilib.

Prokurorların Kiyev üçün çalışdığını iddia edən aksiya iştirakçıları polis əməkdaşlarını daşqalaq ediblər. Polisin gözyaşardıcı qaz və səs qumbaralarına əl atması gərginliyi daha da artırıb. Qarşıdurma zamanı çoxlu sayda adam yaralanıb.

Təxminən iki saat davam edən toqquşmalarda aksiya iştirakçıları binanın şüşələrini sındırım, içəri Molotov kokteyli atıb. Polis əməkdaşları binanın içərisinə girməyə və oradan müqavimət göstərməyə başlayıblar. Amma qısa müddət ərzində separatçılar binanı ələ keçiriblər.

Rusiyameyllilər polis əməkdaşlarına aid xüsusi vasitələrinə də sahibləniblər. Onlar prokurorluq binasının önündə Ukrayna bayrağına od vurublar.

Qeyd edək ki, Donestkdə gərginliyin hökm sürdüyü aprel ayı ərzində separatçılar yerli administrasiya, bələdiyyə və başqa dövlət binalarını ələ keçiriblər. Binalar ələ keçirilən vaxt polisin passivliyi xeyli tənqid olunmuşdu. Ukrayna prezidentinin səlahiyyətlərini icra edən Aleksandr Turçinov da polisin qətiyyəsizliyini pisləmiş və "bəzi xainlər" üzündən çarəsiz qaldıqlarını bildirmişdi.