Bakının mərkəzində bağlanan yollar 2 günə açılacaq
26 mart 2015 14:08 (UTC +04:00)

Bakının mərkəzində bağlanan yollar 2 günə açılacaq

 

 

 “Yusif Səfərov küçəsinin Bakı şəhər Baş Polis İdarəsinin qarşısından Heydər Əliyev prospektinə qədər olan hissəsində asfalt-beton işləri aparılıb. İndi bu yolun hərəkət hissəsində üfüqi nişanlanma işləri gedir. Güman edirəm ki, yolun həmin hissəsi 1-2 saatdan sonra nəqliyyatın hərəkəti üçün tam açıq olacaq”.

 

Bunu “APA-Economics”ə açıqlamasında Nəqliyyat Nazirliyi "Azəryolservis" ASC-nin mətbuat katibi Pünhan Mürsəliyev bildirib.

 

Onun sözlərinə görə, dünən axşam saat  23:00-dan etibarən təmir işləri ilə əlaqədar Heydər Əliyev prospektinin qarşısından Yusif Səfərov küçəsinə çıxış nəqliyyatın hərəkəti üçün bağlanıb: “Hazırda o küçədə də asfalt-beton örtüyünün döşənməsi işləri gedir. Bu gün gecə saatlarında orada da işlər tamamilə yekunlaşacaq, yolun xətlənməsi işləri aparılacaq və həmin yol səhər saatlarına tam açıq olacaq”.

 

P. Mürsəliyev deyib ki, dünən Süleyman Rüstəm küçəsində asfalt-beton işləri yekunlaşıb: “Hazırda orada kommunikasiya quyularının dəmir-beton plitələrinin və baxış qapaqları dəyişdirilir. Sabahdan orada da işlər yekunlaşacaq”.

 

O, həmçinin qeyd edib ki, bu gün səhər saatlarından Şəmsi Bədəlbəyli küçəsinin Azadlıq prospekti ilə kəsişməsindən Rəşid Behbudov küçəsi ilə kəsişməsinədək olan hissəsi nəqliyyatın hərəkəti üçün bağlanıb: “Hazırda həmin ərazidə köhnə asfalt-beton örtüyünün qaşınması işləri gedir. Sabahdan etibarən isə ora yeni asfalt-beton örtüyünün döşənməsinə başlanılacaq”.

 

“Azəryolservis” rəsmisi əlavə edib ki, paralel olaraq şəhərin digər istiqamətlərində də işlər gedir: “Ümumiyyətlə, yaxın 2 gün ərzində Bakının mərkəzində bağlanan bütün yollarda aparılan təmir işləri tamamilə yekunlaşacaq. İş günlərində artıq Bakıda bağlı küçə olmayacaq. Bütün yollar açılacaq”.

 

P.Mürsəliyev bildirib ki, hazırda Səttar Bəhlulzadə küçəsində də asfalt-beton örtüyü döşənir: “2200 metr məsafədə səki daşları qoyulub və asfalt-beton örtüyünün döşənməsi işlərinə başlanılıb. Dünəndən etibarən artıq bu yolda da işlər gedir. Bakının Puşkin küçəsindən Rəşid Behbudov küçəsinə qədər olan hissəsindəki yolda da xətlənmə işlər yekunlaşıb və yol artıq istifadəyə verilib.  Həmçinin Dilarə Əliyeva və Nizami küçələrində də işlər yekunlaşıb”.

 

Qurum rəsmisi “20 Yanvar” dairəsində genişləndirmə işlərinin və Bakı dairəvi yolunda təmir işlərinin davam etdiyini vurğulayıb: “Biləcəri enişindən Rəşid İsmayılov küçəsinədək olan hissədə işlər görülür. Ziya Bünyadov küçəsinin Atatürk və Azadlıq prospekti ilə kəsişməsində yol ötürücülərində temperatur tikişlərinin dəyişdirilməsi işləri davam etdirilir. Bu işlər isə xeyli müddət çəkəcək. Amma 2 günə şəhərin mərkəzində bir dənə də olsun bağlı küçə olmayacaq”.  

# 217
avatar

Oxşar yazılar