Ağsaqqallar konfrans keçirdi

Bu gün Bayıl yaşayış sahəsində yerləşən 49 saylı «İntellekt» məktəb-liseydə Səbail rayon Ağsaqqallar Şurasının hesabat konfransı keçirilib. Səbail rayon İcra Hakimiyyətindən Lent.az-a verilən məlumata görə, hesabat konfransında çıxış edən Səbail rayon Ağsaqqallar Şurasının sədri Mirhəbib Seyidov məruzəsində qeyd edib ki, rayonda yaşayan ağsaqqal, veteran, ahıl vətəndaşların huquqlarının qorunması, onlara köməklik göstərilməsi istiqamətində xeyli işlər görülüb. Şura üzvləri RİH-nin keçirdiyi və təşkil etdiyi tədbirlərdə, həmçinin rayondakı idarə və təşkilatlarda, xüsusilə ali və orta tədris müəssisələrində yeniyetmə və gənclərin hərbi vətənpərvərlik tərbiyəsinin möhkəmləndirilməsi ilə bağlı tədbirlərdə, rayondakı hərbi hissələrdə, Daxili Qoşunların hərbi hissələrində, çağırışçıların ordu sıralarına yola salınması mərasimlərində fəal iştirak edib: “Son illər ərzində rayonda sakinlərin, ilk növbədə isə ağsaqqal və veteranların sosial problemlərinin həlli ilə bağlı xeyli işlər həyata keçirilib. Belə ki, 20-ci yaşayış sahəsində rayon İcra Hakimiyyəti tərəfindən yaradılmış «Veteran Neftçilər Klubu» məhsuldar fəaliyyət göstərib. Bu klubda ağsaqqal və veteranlarımızın toplaşması və istirahətinin təşkili üçün hər cür şərait yaradılıb. Hər il Qələbə günü ərəfəsində II Dünya müharibəsi iştirakçıları rayon İcra Hakimiyyəti Başçısı tərəfindən qəbul olunur, bir çox tədbirlərdə onlara maddi və digər yardımlar göstərilir. Son 3 ildə 6 nəfər ağsaqqal RİH-nin maddi dəstəyi ilə Həcc ziyarətinə göndərilib”.

Konfransda çıxış edən Badamdar qəsəbə sakini Allahverdi Bəndəliyev, əməkdar müəllim Aliyə Təhmasib, əməkdar mühəndis Telman Hacıyev, müharibə veteranı Cəbrayıl Əliyev, Bibiheybət qəsəbə ağsaqqalı Hacı Qərib Şamilov və başqaları rayonda görülən işləri və Ağsaqqallar Şurasının ötən dövrdəki fəaliyyətini müsbət qiymətləndirib.

Konfransda Səbail rayon İcra Hakimiyyətinin başçısı Asif Əsgərov da iştirak edib.