Rəsədxanadan yerə yaxınlaşan asteroidlə bağlı AÇIQLAMA - YENİLƏNİB

“Aprelin 20-də böyük JO25 adlı böyük asteroid Yerin yaxınlığından keçəcək. Lakin bunun Yerə bir təhlükəsi yoxdur”.

Bunu APA-ya AMEA-nın Nəsrəddin Tusi adına Şamaxı Astrofizika Rəsədxanasının direktor müavini, fizika üzrə fəlsəfə doktoru Xıdır Mikayılov deyib.

Onun sözlərinə görə, bu asteroid dəqiq orbiti üzrə hərəkət edir. Bu gün maksimal yaxınlaşmanın olacağını deyən X. Mikayılov əlavə edib ki, JO25 adlı asteroid 2014-cü ildə kəşf edilib: “Ölçüsü 1.5 km-dir. Yerə ən yaxın məsafəsi 1.76 milyon km olacaq. Bu da Ayla Yer arasındakı məsafədən 4.6 dəfə böyükdür. Asteroidin hərəkət sürəti 33.6 km/san təşkil edir. Onu adi gözlə görmək mümkün olmayacaq. Bu asteroidin parlaqlığı adi gözlə görə bildiyimiz ən zəif ulduzdan 100 dəfə zəifdir. Onu görünüş sahəsi böyük olan teleskoplardan izləmək olar. Azərbaycandan bu asteroidi aprelin 19-u gecədən səhərə kimi, sabah isə axsam saat 01:00-a kimi görmək mümkün olacaq. Asteroid adi ulduz kimi deyil və. Teleskopla baxdıqda ulduzlar nöqtə kimi, bu obyekt isə nazik uzun bir xətt kimi görünəcək. Bu asteroidin ölçüsü bir az böyük olduğuna görə səs-küyə səbəb olub. Ümumiyyətlə, həftə ərzində bir neçə dəfə müxtəlif ölçülü asteroid Yerin yaxınlığından keçir və heç bir təhlükə yaratmır. Lakin bunun ölçüsü çox olduğundan Yerə çox yaxın olsaydı təhlükə ehtimalı ola bilərdi. Ancaq indi Yerdən çox uzaq məsafədə keçdiyindən təhlükə gözlənilmir”.

X. Mikayılov əlavə edib ki, bu asteroidin bir də Yerə yaxınlaşması 500 ildən sonra gözlənilir. 2004-cü ildə ölçüsü 5 km olan asteroid Yerlə Ay arasındakı məsafədən 4 dəfə artıq bir məsafədən keçib. Direktor müavini qeyd edib ki, birdə belə bir nəhəng asteroidin Yerin yaxınlığından keçməsi 2027-ci ildə gözlənilir: “Bu asteroid Yerdən bir Ay məsafəsi qədər, yəni 380 min km məsafədən keçəcək. Bu da Yerə indikindən 4,6 dəfə yaxın deməkdir. O, daha parlaq olacaq və qaranlıq havada adi gözlə görmək mümkün olacaq. Onun parlaqlığı adi gözlə görünən ulduzdan 2,5 dəfə az olacaq”.

***

15:38

Nasa mütəxəssislərinin xəbər verdiyi kimi, bu gün təhlükəli hesab edilən “2014 JO25” asteroidi yer kürəsinə yaxınlaşmaqdadır.

Lent.az-ın The Sun-a istinadən məlumatına görə, asteroid 3 il bundan əvvəl, 2014-cü ilin may ayında kəşf edilib. Onun diametri 1,5 km-dir.

Asteroid Yer kürəsindən 1,77 milyon kilometr məsafədə, saniyədə 33 km və ya saatda 120 min km sürətlə keçəcək.

Asteroid son 400 ildə ilk dəfə yerə ən yaxın məsafədə yaxınlaşacaq səma cismi sayılır.

NASA alimlərinin sözlərinə əsasən, asteroid daha təhlükəsiz məsafədən keçəcəyi üçün o qədər də təhlükəli deyil. Nəhəng səma cismi bu gün Yerə maksimal məsafədə ( 1,77 milyon km) yaxınlaşacaq.

Deyilənə görə, Asteroidin parlaq səthinə görə onu kiçik teleskopla da müşahidə etmək mümkün olacaq.