Sığınacaqdan imtina edən qadın: "Küçədə günə 300 manat qazanırdım"

Bakıda sığınacağa yerləşdirilən qadın oradan imtina edib.

Bu barədə Lent.az-a “Təmiz Dünya” Qadınlara Yardım İctimai Birliyinin sədri Mehriban Zeynalova məlumat verib.

O bildirib ki, bir müddət əvvəl sığınacağa yerləşdilən qadın orda qalmaqdan imtina edib:

"O qadın bir müddət əvvəl polis tərəfindən bizim sığınacağa gətirilmişdi. Demişdi ki, övladları, qohumları tərəfindən küçəyə atılıb. Yerimə qabiliyyətini itirmiş qadın bizim sığınacaqda texniki işçi olmadığı üçün Sosial Müdafiə Nazirliyinin Zabratda yerləşən evsizlər üçün sığınacağına yerləşdirildi".

M.Zeynalova deyib ki, qadın dünən həmin sığınacağın əməkdaşları təhqir edərək oradan ayrılmaq istədiyini deyib:

"Dünən çox məyusedici bir halla rastlaşdıq. Xanım sığınacağın işçilərini çox kobud şəkildə təhqir edərək, onu küçəyə aparmaqlarını tələb edib. O deyib ki, küçədə qaldığı hər gün ən azı 300 manat qazanıb. Ona görə də sığınacaq xidmətindən imtina edir".