İsti gecələrdə bu səhvləri etməyin – Yuxunuz pozula bilər

Yay aylarında isti gecələr yuxunun keyfiyyətini ciddi şəkildə pisləşdirə bilər. Mütəxəssislər bildirirlər ki, belə havalarda yataqda seçilən bədən mövqeyi daha rahat yuxuya getməyə kömək edir.

Lent.az xəbər verir ki, yuxu üzrə mütəxəssis doktor Elli Geyrin sözlərinə görə, isti gecələrdə ən uyğun mövqe "dəniz ulduzu" pozası hesab olunur.

Bu vəziyyətdə insan kürəyi üstə uzanır, qollarını və ayaqlarını isə mümkün qədər yana açır. Mütəxəssis bildirir ki, bu mövqe bədənin ətrafında havanın daha yaxşı dövran etməsinə şərait yaradır və istiliyin təbii şəkildə xaric olmasına kömək edir.

Doktor Elli Geyr bildirib ki, yuxu zamanı bədənin həddindən artıq isinməsi yuxunun keyfiyyətini əhəmiyyətli dərəcədə pisləşdirə və onun müddətini qısalda bilər. "Xüsusilə gecə saatlarında yüksək temperatur dərin yuxu mərhələsinin müddətini azaldır. Məhz bu mərhələdən sonra insan özünü dincəlmiş və enerjili hiss edərək oyanır", - deyə mütəxəssis vurğulayıb.

Ekspertin sözlərinə görə, insan yatağa uzandıqdan sonra seçdiyi yuxu mövqeyi də böyük əhəmiyyət daşıyır. ""Dəniz ulduzu" pozasında yatmaq bədənin ətrafında havanın daha yaxşı dövr etməsinə kömək edir. Bu isə isti gecələrdə daha rahat və keyfiyyətli yuxu almağa şərait yaradır", - deyə Elli Geyr izah edib.

Mütəxəssis vurğulayır ki, bədən temperaturunun tənzimlənməsində kifayət qədər maye qəbulu mühüm rol oynayır.

"Hidratasiya, yəni orqanizmin kifayət qədər maye ilə təmin olunması bədən temperaturunun tənzimlənməsi üçün çox vacibdir. Gün ərzində kifayət qədər su içmək orqanizmin gecə saatlarında artıq istiliyin öhdəsindən daha yaxşı gəlməsinə kömək edir", - deyə doktor Geyr bildirib.

Bununla yanaşı, o, gün ərzində qəbul edilməli olan suyun böyük hissəsini axşam saatlarına saxlamamağı tövsiyə edir. "Gün ərzində suyu bərabər şəkildə qəbul etsəniz, yatmazdan əvvəl çox su içməyə ehtiyac qalmaz. Bu da gecə yuxusunun daha rahat və keyfiyyətli olmasına müsbət təsir göstərər", - deyə mütəxəssis əlavə edib.

Doktor Geyr yatmazdan təxminən bir saat əvvəl soyuq deyil, ilıq duş qəbul etməyi tövsiyə edir. "İlıq duş bədənin təbii soyuma mexanizmini dəstəkləyir. O, dəridəki qan damarlarının genişlənməsinə səbəb olur və duşdan çıxdıqdan sonra orqanizm istiliyi daha səmərəli şəkildə xaric edir", - deyə o izah edib.

Mütəxəssis maraqlı bir üsul da təklif edir. O, corabları azca isladaraq yatmazdan əvvəl təxminən 10 dəqiqə dondurucuda saxlamağı məsləhət görür. "Ayaqlar bədən temperaturunun tənzimlənməsində mühüm rol oynayır. Soyudulmuş corabları geyindikdə orqanizm sərinliyi hiss edir və bu, daha tez yuxuya getməyə kömək edə bilər", - deyə doktor Geyr bildirib.

Mütəxəssislərin fikrincə, isti gecələrdə rahat yatmağın ən təsirli yollarından biri də düzgün yataq dəstini seçməkdir. Ağır sintetik parçalar əvəzinə pambıq kimi təbii materiallardan hazırlanmış yataq dəstlərindən istifadə etmək tövsiyə olunur. Bu parçalar havanı daha yaxşı keçirir, bədənin soyumasına kömək edir və yay gecələrində boğucu istilik hissini azaldır.