Əsirlikdən qayıdan qazi:  "Ağır yaralanaraq 5 gün meşədə tək qaldım"
11 fevral 2021 15:20 (UTC +04:00)

Əsirlikdən qayıdan qazi: "Ağır yaralanaraq 5 gün meşədə tək qaldım"

"Heç nəyə görə peşman deyiləm, özümlə və döyüş yoldaşlarımla fəxr edirəm".

APA-nın məlumatına görə, bunu Ali Hərbi Məktəbdə keçirilən görüşdə jurnalistlərə açıqlamasında erməni əsirliyindən qayıdan qazi Mobil Əhmədzadə deyib.

O bildirib k 2014-cü ildə Cəmşid Naxçıvanski adına hərbi liseyə qəbul olub: "2017-ci ildə oranı bitirmişəm. Təhsilimi daha sonra Ali Hərbi Məktəbdə davam etdirdim. Ötən il sentyabrın 27-də başlanan Vətən müharibəsinə kiçik leytenant kimi yollandım. Tağım komandiri vəzifəsində bir çox ərazilərdə tapşırıqları icra etdim. Noyabrın 8-də Şuşa-Xankəndi istiqamətində ağır yaralanaraq 5 gün meşədə tək qaldım. Sonra özümdə olmadığım üçün düşmən tərəfindən əsir götürüldüm. Ümumilikdə 35 gün əsirlikdə oldum. Məni 4 gün reanimasiyada, qalan günləri isə həbsxanada saxladılar. Orada bir ayağımı amputasiya ediblər. Xəstəxanada olduğum müddətdə isə ermənilər tərəfindən işgəncə görmüşəm. Dekabr ayının 14-də cənab Prezident, Ali Baş Komandan İlham Əliyevin apardığı siyasət nəticəsində əsirlikdən azad edilərək Azərbaycana gətirilmişəm".

M. Əhmədzadə bildirib ki, döyüş meydanında Ali Hərbi Məktəbdə öyrəndiyi biliklər sayəsində uğurlu nəticələr əldə edib: "Burada olan müəllim mütəxəssis heyəti bizə hərbinin incəliklərini öyrədib. Öyrəndiklərimiz sayəsində biz artıq döyüşün necə olacağını bilirdik. Biz hər şeyə görə burada olan rəhbərliyə, müəllim və zabit heyətində borcluyuq. Kursant yoldaşlarımdan beş nəfəri şəhidlik zirvəsinə ucalıb. Mən də onlarla eyni döyüşlərdə iştirak etmişəm, ağır yaralanmışam, onlar isə yüksək səviyyədə döyüşərək şəhid olublar".

Qarabağ qazisi sonra Azərbaycan xalqına və Ali Baş Komandana təşəkkür edib: "Bizə müharibə dövründə də, müharibədən sonrakı dövrdə də dəstək oldular. Hər şeyə görə təşəkkür edirəm".

# 2445
avatar

Oxşar yazılar