Bayram günləri Bakının girişində post qurulacaq? - RƏSMİ CAVAB

“Sürücülər yuxulu, yorğun halda sükan arxasında əyləşməsinlər”.

Bunu Baş Dövlət Yol Polisi İdarəsinin ictimaiyyətlə əlaqələr şöbəsinin rəisi, polis polkovnik-leytenantı Namidan Piriyev bayram günlərində rayonlara gediş-gəlişlə bağlı Lent.az-ın sualını cavablandırarkən deyib. O, qeyri-iş günlərində səfərə çıxan sürücülərə yol polisinin tövsiyələrini çatdırıb:

“Mayın 9-dan 16-dək bayram günləridir. Ramazan bayramında ehtimal olunur ki, asudə vaxtından istifadə edib rayonlara üz tutanların sayı artacaq. Bununla bağlı sürücülərə yol hərəkəti qaydalarına riayət etməyi tövsiyə edirik. Xüsusən, yuxulu, yorğun halda sükan arxasında əyləşməsinlər. Təhlükəsizlik qaydalarına tam əməl etsinlər. Təyin olunmuş sürət həddini gözləsinlər”.

Namidan Piriyev həmçinin gələn qeyri-iş günləri ilə əlaqədar Bakının giriş-çıxışında postlar qurulub-qurulmayacağına da aydınlıq gətirib:

DYP şöbə rəisi Namidan Piriyev

“Nazirlər Kabineti yanında Operativ Qərargah bu barədə heç bir qərar verməyib. Dünən keçirilən brifinqdə də yeni məhdudiyyət tətbiq olunmadı. Buna görə, insanlar rahat şəkildə rayonlara gedə və oradan qayıda bilərlər”.

DYP rəsmisi yol polisinin gücləndirilmiş iş rejimində, növbəli şəkildə xidmət aparacağını vurğulayıb.