APA və KOBSKA arasında əməkdaşlıq Memorandumu imzalanıb - FOTO

APA MMC ilə “Kiçik və Orta Biznes Subyektləri və Klublarının Assosiasiyası” İctimai Birliyi (KOBSKA) arasında əməkdaşlıq haqqında Memorandum imzalanıb.

Lent.az xəbər verir ki, Memorandumu APA MMC-nin Baş direktoru Vüsalə Mahirqızı və KOBSKA İdarə Heyətinin sədri Nigar Ələsgərova imzalayıb.

Memoranduma əsasən, tərəflər mikro və kiçik sahibkarlığın inkişafı istiqamətində əməkdaşlıq edəcək.

Memorandumun imzalanması mərasimində qeyd olunub ki, APA və KOBSKA müxtəlif layihələrin hazırlanması və icra edilməsi, mikro, kiçik və orta sahibkarlıq mövzusunda beynəlxalq və yerli tədbirlərdə iştirak, bu tipli tədbirlərin ölkədə təşkili və işıqlandırılması, müəyyən mövzular üzrə araşdırmaların aparılması və tətbiqinə dair təkliflərin hazırlanması, müxtəlif maarifləndirici fəaliyyətlərin təşkili və digər məsələlər üzrə birgə çalışacaq.

Vüsalə Mahirqızı mikro, kiçik və orta sahibkarlığın inkişafının mühüm əhəmiyyət kəsb etdiyini vurğulayaraq, mətbuatın bu sahəyə daha böyük diqqət ayırmalı olduğunu bildirib. O, APA-nın indiyə qədər də sahibkarlığın inkişafına dair mövzulara daim diqqətlə yanaşdığını, bundan sonra da bu sahənin inkişafı üçün lazımı informasiya dəstəyi verməyə hazır olduğunu qeyd edib. Vüsalə Mahirqızı APA-KOBSKA əməkdaşlığının sahibkarlığın inkişafına mühüm töhfə verəcəyinə əminliyini ifadə edib.

Öz növbəsində, Nigar Ələsgərova mikro, kiçik və orta sahibkarlığın inkişafının və bu sahənin təşviqinin vacibliyini qeyd edib, bu işdə mətbuatının mühüm rol oynadığını vurğulayıb.

KOBSKA rəhbəri APA ilə əməkdaşlığın mikro, kiçik və orta sahibkarlığın daha da inkişafına yardım edəcəyinə inamını ifadə edib.

Azəri-Press Agentliyi (APA) dünyada baş verən önəmli hadisələrlə yanaşı, əsasən, Azərbaycan və Cənubi Qafqazı əhatə edir, Azərbaycan, rus, ingilis dillərində xəbər yayımı ilə məşğuldur.

“Kiçik və Orta Biznes Subyektləri və Klublarının Assosiasiyası” İctimai Birliyinin (KOBSKA) əsas məqsədi ölkədə yeni dövr sahibkarlıq mühitinin inkişafına xidmət etməkdir.