130 manata qonaq, 40 manata oyuncaq - ARAŞDIRMA

Yeni, 2022-ci ilə sayılı günlər qalıb. Yeni il deyəndə ilk ağıla gələn bayramı simvolizə edən Şaxta baba, Qar qız, şam ağacı olur. İnsanlar bu bayrama xüsusi olaraq hazırlaşırlar. Onlar şam ağacları, oyuncaq şaxta babalar, yolkanı bəzəmək üçün çılçıraqlar alırlar.

İnsanlar bayram alış-verişini müxtəlif üsullarla edirlər. Belə ki, onlar bunu ya onlayn sifariş verirlər, ya da gedib özləri alırlar. Azərbaycanda da hər bayram qabağı müxtəlif yerlərdə yarmarkalar təşkil olunur. Bu yarmarkalarda bayrama aid hər şeyi tapmaq mümkündür.

Budur, artıq bayram yarmarkaları da öz fəaliyyətinə başlayıb. Bu günlər Bakı şəhərinin 12 rayonunda 20-yə yaxın yerdə bayram yarmarkaları təşkil edilib. Həmin yarmarkalara Bakı Şəhər Ticarət və Xidmət Departamenti tərəfindən nəzarət olunur.

Bəs, bayram Azərbaycan insanına neçəyə başa gəlir? Bakıdakı yarmarkalara baş çəkirik.

Deməli, əgər siz yolka almaq istəyirsinizsə, qiymətlər 6 manatdan 100 manata qədər dəyişir.

Yolkanı bəzəmək üçün isə oyuncaqların qiyməti belədir:

Yarmarkada 40 qəpiyə də, 2 manata da yolka oyuncağı əldə edə bilərsiniz. Zərlərin qiyməti isə 50 qəpikdən başlayır. Ən baha olan zər isə 3 manatdır. Yolka işıqlarının qiyməti 5-50 manat arasında dəyişir.

Qeyd edək ki, yolka oyuncaqlarının qiyməti ölçülərinə görə də fərqlənir. Belə ki, böyük oyuncaqların qiyməti 35-40 manat təşkil edir.

Uşaqların ən çox sevdiyi adi maskaların qiyməti 20 qəpik, işığı yananlar isə 2 manatdır. Hədiyyələr isə 3-4 manat arasında dəyişir. Şam ağacı qozalarının qiyməti 4 manatadır.

Bayramı əsas simvolizə edən Şaxta Baba oyuncaqlarının ən böyüyü 55, balacası 5 manatdır.

Yarmarkadakı satıcılar deyir ki, Yeni İlə hələ xeyli vaxt qalmasına baxmayaraq, satış yaxşıdır. Alıcılar isə yolka və yolka oyuncaqlarının qiymətlərindən narazıdırlar. Onların dediyinə görə, ən baha olanı oyuncaqlardır.

Alıcı Gülsənəm Abdullayeva Lent.az-ın əməkdaşıyla söhbətində deyir ki, yarmarkalarda qiymətlər bu qədər baha olmamalıdır:

“Gəlmişdim yolka almağa. Ən ucuz yolka 6 manatdır. O da o qədər balacadır ki, varlığı bilinmir. Normal yolkaların qiyməti 85 manatdır. Belə şey olar. Süni şam ağacıdı da”.

Digər bir alıcı Sevinc xanım isə yolka oyuncaqlarının qiymətindən şikayətçidi:

“Balaca yolka oyuncağıdır, qiyməti də 2 manat. Mən indi o oyuncaqdan neçə dənə alım ki, yolkanı bəzəyim? Bütün pulu gərək elə o oyuncaqlara verəsən”.

Başqa bir müştəri isə deyir ki, Yeni ilə az qalmış qiymətlərin necə olacağını təsəvvür edə bilmir:

“Uşaqlar üçün yeni il hədiyyəsi satırlar 4 manata. İçini açırsan ki, 4 manatlıq heç nə yoxdur”.

Onu da qeyd edək ki, evə Şaxta Baba və Qar Qız sifarişləri 15-130 manat arasında dəyişir. Onları evə qonaq çağıranda qiymətlər gətirəcəkləri hədiyyə sayından və göstərəcəkləri xidmət saatından asılıdır.

Hə, sonda belə bir nəticəyə gəlirik: 2022-ci ilə yeni bayram atributları ilə girmək istəyənlərin xeyli xərci çıxacaq. Əgər insanlar bahaçılıqdan narazılıq edirlərsə, satış da çox olmayacaq. Ona görə də, hər iki tərəfin qazanması üçün qiymətlərin ucuzlaşdırılması haqqında düşünmək lazımdır. Nəzərə alsaq ki, bayramı ən çox uşaqlar sevir. Elə onlara xatir də satıcılar qiymətlərdə endirim etsə, yaxşı olar. Axı bayram gəlir...