Jurnalistlərimiz Avropa ölkələrinə səfər edəcəklər - FOTO

Fevralın 25-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunda (KİVDF) ölkəmizdə səfərdə olan Beynəlxalq Mətbuat İnstitutunun direktoru Alison Betel Makkenzi və qurumun mətbuat və kommunikasiya məsələləri üzrə meneceri Antoni Milzlə görüş keçirilib. Fondun mətbuat xidmətindən Lent.az-a verilən məlumata görə, görüşdə KİVDF-nin icraçı direktoru Vüqar Səfərli və Müşahidə Şurasının sədri Umud Mirzəyev iştirak edib.

V.Səfərli Fondun yaranma tarixi, fəaliyyət mexanizmi və iş prinsipi haqqında qonaqlara ətraflı məlumat verib. Bundan əlavə o, KİV-in maddi-texniki bazasının təkmilləşdirilməsi məqsədilə indiyə qədər həyata keçirilən layihələr, jurnalistlərin sosial müdafiəsinin gücləndirilməsi və peşəkarlığın artırılması məqsədilə fərdi yazı müsabiqələrinin keçirildiyi barədə görüş iştirakçılarının diqqətinə çatdırıb. Fondun rəhbəri gələcəkdə jurnalistlərin beynəlxalq təcrübəni öyrənmək məqsədilə BMİ-nin vasitəsilə Avropa ölkələrinə səfərlərinin təşkil edilməsini Alison Makkenzidən xahiş edib.

Fondun indiyə qədər gördüyü işləri müsbət qiymətləndirən Makkenzi jurnalistlərin sosial vəziyyətinin, KİV-in maddi texniki bazasının gücləndirilməsi və onların peşəkarlığının artırılması istiqamətində Fond tərəfindən atılan addımları və həyata keçirdikləri tədbirləri dəstəklədiyini bildirib. Daha sonra BMİ rəhbəri gələcəkdə azərbaycanlı jurnalistlərin peşəkarlığının artırılması məqsədilə Avropa ölkələrinə səfərlərin təşkilinə lazımi dəstək verəcəklərini açıqlayıb.

Qeyd edək ki, BMİ dünyanın ən nüfuzlu media təşkilatlarından biri olmaqla yanaşı, BMT və UNESKO-nun toplantılarında məsləhətçi səs hüququna malikdir.