Məmur olmaq istəyənlərin müsabiqəsi başlayır

Ötən ay dövlət orqanlarında vakant yerlərə qəbul üçün keçirilən test imtahanlarında uğur qazanmış namizədlər mayın 12-dən iyulun 21-dək müsabiqənin növbəti mərhələsindən keçəcəklər. Müsahibə formasında keçiriləcək müsabiqənin bu mərhələsində 539 namizədin iştirak edəcəyi gözlənilir.

Dövlət Qulluğu Məsələləri üzrə Komissiyadan Lent.az-a verilən məlumata görə, müsabiqənin müsahibə mərhələsində namizədlərin əldə etdikləri nəticələr (həm dövlət orqanları, həm də vakant vəzifələr üzrə) və digər statistik məlumatlar gündəlik qurumun rəsmi internet saytında (www.csc.gov.az və ya www.dqmk.gov.az) yerləşdiriləcək. həmçinin hər bir namizədə müsahibə nəticəsində müvafiq dövlət qulluğu vəzifəsinə uyğun olub-olmadığı barədə SMS-lə məlumat göndəriləcək.

Xatırladaq ki, martın 6-da Dövlət Qulluğu Məsələləri üzrə Komissiya 29 dövlət orqanında inzibati vəzifələrin altıncı – doqquzuncu təsnifatlarına uyğun olan 663 vakant vəzifəsinin tutulması üçün müsabiqə elan etmişdi. Aprelin 9-dək davam edən sənəd qəbulunda 2862 namizəd qeydə alınmışdı. Aprelin 25-də keçirilən test imtahanda isə 539 namizəd tələb olunan balı toplayaraq, ikinci mərhələdə iştirak etmək hüququ qazanıb.

Elxan SALAHOV