Torpaq satan bələdiyyələr əvvəlcə çıxarış almalıdır

Daşınmaz Əmlakının Dövlət Reyestr Xidmətindən çıxarış alınmadıqda bələdiyyə torpaqları hərraca çıxarıla bilməz

Bələdiyyə qurumları hərraca çıxarmaq, yaxud da fərdi ev tikintisi üçün hərracdan kənar vətəndaşlara torpaq satmaq üçün əvvəlcə Daşınmaz Əmlakının Dövlət Reyestr Xidmətinin yerli orqanlarına müraciət etməlidir.

Lent.az-ın məlumatına görə, bu barədə Daşınmaz Əmlakının Dövlət Reyestr Xidmətinin rəisi Arif Qaraşov jurnalistlərlə söhbətində deyib. Onun sözlərinə görə, bələdiyyələr satışa çıxarmaq istədiyi torpağın ona məxsus olduğunu təsdiq edən çıxarış almalıdır. Bu sənəd həm kadastr xəritəsindən, həm də dövlət reyestrindən çıxarışlardan ibarət olacaq. Bundan sonra torpağın hüquqi sahibi olan bələdiyyəyə məhdudiyyət arayışı veriləcək. Həmin sənəddə torpaq üzərində hansısa məhdudiyyətin olub-olmadığı əks olunacaq. Bu sənədləri aldıqdan sonra bələdiyyələr torpağı satmaq üçün yerli hərrac komissiyasına müraciət etməlidir.

Arif Qaraşov bildirib ki, torpaqların satışı üzrə hərracın qalibi olan fiziki və hüquqi şəxslər nəticə barədə hərrac komissiyasından aldığı şəhadətnamə əsasında satıcı, yəni bələdiyyə ilə notariat qaydasında müqavilə bağlamalıdır.

Onun sözlərinə görə, bu halda hərrac yolu ilə əldə olunmuş torpaqların Daşınmaz Əmlakının Dövlət Reyestr Xidmətində qeydiyyata alınmasında hansısa problem olmayacaq. Həmçinin bu prosedur qaydalardan keçən torpaq mülkiyyətçiləri sonradan həmin sahələri başqalarına da sata bilər.

Elxan SALAHOV