Gənclərin Hərbi Vətənpərvərlik Yay Düşərgəsi təşkil olunub – FOTO

Gənclər və İdman Nazirliyi və Tərxis Olunmuş Hərbçilərin Gəncləri Maarifləndirmə İctimai Birliyi birgə 17-27 avqust tarixlərində İsmayıllı rayonunda Gənclərin Hərbi Vətənpərvərlik Yay Düşərgəsi təşkil edib.

Lent.az-ın verdiyi məlumata görə, Qarabağ veteranları, şəhid ailələrinin övladları üçün nəzərdə tutulan düşərgədə 14-29 yaş qrupundakı yeniyetmə və gənclərin səmərəli istirahəti təşkil olunub, regionun tarixi məkanlarına (Lahıc, Basqal) və mənzərəli yerlərinə gəzintilər təşkil olunub.

Düşərgədə yeniyetmələrin Qarabağ müharibəsi veteranları ilə görüşü təşkil edilib, hərbi vətənpərvərliklə bağlı mühazirələr oxunub. Eyni zamanda şahmat, dama, voleybol və futbol turnirləri keçirilib, qaliblər mükafatlandırılıblar. Mükafatlandırma mərasimində çıxış edən Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli deyib ki, yeniyetmə və gənclər təhsil sahəsində fərqlənməyə və yüksək ixtisaslı kadrlar kimi yetişməyə çalışmalı, Vətənə və xalqa layiqli xidmət etməlidirlər. Milli Qəhrəman Mübariz İbrahimov kimi gənclərimizin çox olduğunu söyləyən Emin Həsənli Azərbaycan ordusunun torpaqlarımızı işğaldan hər an azad etməyə hazır olduğunu vurğulayıb: “Gənc nəslin vətənpərvər ruhda yetişməsi çox önəmlidir. Bu düşərgənin təşkilində də məqsəd məhz budur”.