"Virtual məktəb"də YENİLİK: hər kəs öz müəllimindən dərs alacaq?

Təhsil Nazirliyinin "Virtual məktəb" layihəsi şagirdlər üçün hansı imkanları açır və açmaqda davam edəcək? Bu yeniliyin müsbət və çatışmayan tərəfləri hansılardır və aradan qaldırılması üçün hansı addımları atmaq olar?

Təhsil eksperti Kamran Əsədov mövzu ilə bağlı Lent.az-a açıqlama verib. O bildirib ki, martın 3-dən bütün təhsil müəssisələrində dərslər dayandıqdan sonra Təhsil Nazirliyinin çevik qərar qəbul edib martın 11-dən etibarən Mədəniyyət TV-də Tele Dərs layihəsinə başlaması şagirdlər üçün dərs axınının təmin olunmasına imkan verdi: "Sonradan isə şagirdlərin tədris pyosesi ilə bağlı biliklərini möhkəmləndirmək üçün yeni layihə başlanıldı. "Virtual məktəb" layihəsini evdən çıxmadan da şagirdlərin təhsil almalarına davam etmələri baxımında olduqca müsbət qiymətləndirirəm. Təhsil Nazirliyinin bu yeni platforması, orta məktəb şagirdləri üçün təhsilin əlçatımlılığının təmin olunmasıdır. Nəzərə alsaq ki, elektron resurs çatışmazlığı var, Təhsil Nazirliyinin virtual məktəb layihəsi şagirdlər üçün "göydəndüşmədir".

Ekspert bildirib ki, Təhsil Nazirliyinin ümumtəhsil müəssisələrinin şagirdləri üçün məsafədən tədris imkanlarını genişləndirmək məqsədi ilə yaratdığı "Virtual məktəb" sisteminə daxil olduqda şagirdlər yaşlarına uyğun siniflərə düşəcək, Təhsil Nazirliyi tərəfindən təqdim olunmuş teledərslərə baxa biləcək, və həmin mövzulara uyğun müəllimər tərəfindən hazırlanmış tapşırıqları yerinə yetirə biləcəklər:"Platformada tədris materialları, onlayn dərslər, tapşırıqlar və şagird yoldaşları ilə əlaqə saxlamaq üçün imkanlar vardır.

Maraqlısı odur ki, layihədə şagirdlər sinif yoldaşları ilə görüntülü və səsli əlaqə yaratmaq üçün “Chat” funksiyasından istifadə edə bilərlər. Amma burada Təhsil Nazirliyi tərəfindən müəyyənləşdirilmiş müəllimlər şagirdlərlə işləyəcək. Şagirdlərə öz müəllimləri tədris aparmayacaqlar".

Ekspert çatışmazlıqlara da toxunub .Bildirib ki, sayt qeydiyyat üçün aprelin 2-dən aktiv edilib, lakin qeydiyyat zamanı texniki qüsurlar əmələ gəlir: "Qüsurlara baxmayaraq, qısa müddətdə “Virtual məktəb” portalında 250 mindən çox şagird qeydiyyatdan keçib ki, bu sevindirici haldır. Bir məqamı da qeyd edim ki, elektron məktəb seçimindən fərqli olaraq, “Virtual məktəb"ə qeydiyyatda birincilik şagirdə hər hansı bir üstünlük vermir.
Amma təssüflər olsun ki, Təhsil Nazirliyi tərəfindən görülən bu qədər tədbirlərə baxmayaraq təhsilin əlçatanlılığı tam şəkildə təmin olunmayıb. Portalda qeydiyyatdan keçmək prosesi məyyən qədər qəliz və uzundur. Bundan başqa regionlarda şagirdlərin planşet, komputer və şəxsi telefonları olmadığı üçün bu prosesdə iştirak edə bilmirlər".