"Cərimələr silinsin" - Deputatdan TƏKLİF

“Rayonlarda qaz sayğacları ildə bir dəfə yoxlanılır. Bəzən yoxlama üçün Bakıya laboratoriyalara göndərilir”.

Lent.az APA-ya istinadla verir ki, bunu Milli Məclisin bu gün keçirilən iclasında “Qaz təchizatı haqqında” qanuna təklif edilən dəyişikliklərin müzakirəsi zamanı deputat Naqif Həmzəyev deyib.

Deputat bildirib ki, belə olan halda sərf edilən qazın ödənilməsi zamanı problemlər yaranır: “Bu problemin də qanun layihəsində əksini tapması yaxşı olardı”.

Deputat Tahir Kərimli isə qaz təchizatı ilə bağlı İnzibatı Xətalar Məcəlləsinə təklif edilən dəyişikliyə münasibət bildirib: “Hökumət əməkhaqqını, pensiyanı az artıranda biz sual veririk, deyirlər ki, dövlətin gücü buna çatır. Amma cərimələr 300-400% artırılır. Onda niyə əhalinin ödəyəcəyi pul nəzərə alınmır? Bu layihələr qurumlar tərəfindən hazırlanır, Prezident Administrasiyasına göndərilir, biz də onu təsdiqləyirik. Oluruq pis adam. Qaza qarışdırıb bizə hava satırlar. Buna görə mənim xalqıma cərimə tətbiq edəcəklər? Ay hökumət, niyə parlamenti pis vəziyyətdə qoyursunuz? Niyə bu layihəni irəli sürürsünüz? Normativ hüquqi aktlarda publik hüquqi şəxslərin cərimə edilməsinə rast gəlmədim. Bu publik hüquqi şəxslər ancaq cərimə etməklə məşğul olacaq?! AQTA Yasamalda göyərti satanı 1400 manat cərimə edir, sahibkarların başına oyun gətirir. Bu qədər cərimə olar? Prezidentdən xahiş edirəm ki, fevralın 1-nə kimi olan bütün cərimələr silinsin. Neftin qiyməti 100 dollara çatıb. Cərimə hesabına büdcəni doldurmaq lazım deyil. Publik hüquqi şəxsləri cərimə hesabına niyə saxlayaq?”

Deputat Sabir Rüstəmxanlı isə bildirib ki, qazla bağlı problem bütövlükdə respublikada mövcuddur: “Yanvar, fevral ayı olmasına baxmayaraq, artıq qazla bağlı limiti keçənlər var. Bu qiymətləndirmə dəyişməlidir. Bunu müzakirə etməliyik. Cərimə məsələsi Azərbaycanda artıq ciddi problemə çevrilib. Milli Məclis ölkədə ali qanunverici orqandır. Biz burada bir çox məsələ barədə danışırıq. Lakin bizim danışdığımız sanki divarlar üçündür. Bura göndərilən layihə ilə bağlı təklifi verən qurumlardan bizim danışdıqlarımıza reaksiya yoxdur. Cərimələr qaçılmazdır, amma cərimələri əhalinin maaş səviyyəsinə uyğunlaşdırmalıyıq. 300-400 manat maaş alan bir adam 400 manat cərimə verəndə necə dolana bilər? Cərimələr hər maaşa görə müəyyən edilməlidir. Hava ilə cərimə müəyyənləşdirmək olmaz. Cərimə məsələlərində çox diqqətli olmalıyıq”.