Azərbaycan təyyarəsinin qəzası Donbassda MH17 təyyarəsinin vurulmasını xatırladır – “The Telegraph”

Azərbaycan təyyarəsinin gövdəsində vurulan Malayziya təyyarəsinin gövdəsindəki qəlpələrə bənzər zədələr olub.

Azərbaycan Hava Yollarına məxsus təyyarənin Qazaxıstanda qəzaya uğraması 2014-cü ildə Ukrayna səmasında vurulmuş Malayziya Hava Yollarına məxsus MH17 reysinin qəzasına bənzəyir.

Lent.az-ın xəbərinə görə, bu barədə “ The Telegraph” yazır.
Adını açıqlamayan fransız aviasiya eksperti Aktauda baş vermiş qəzanın Rusiyanın dəstəklədiyi separatçıların Donbass üzərində yer-hava raketi ilə sərnişin təyyarəsini vurması və 298 nəfərin ölümünə səbəb olan MH17 faciəsini “xatırlatdığını” deyib.

Bakıdan Qroznıya uçan “Embraer 190” təyyarəsi Aktauda eniş edərkən naməlum səbəbdən marşrutdan çıxıb və qəzaya uğrayıb. Fəlakətdə 38 nəfər ölüb, 29 nəfər sağ qalıb.

Hadisə yerindən çəkilmiş videoda təyyarənin kəskin şəkildə endiyi və yerə çırpılaraq partladığı görünür. Digər görüntülərdə təyyarənin zədələnməsi, o cümlədən gövdənin qanadlardan ayrılması və qəlpələrə məruz qalmanın aydın əlamətləri göstərilib.

Fransanın BEA agentliyinin mütəxəssisi anonimlik şərti ilə bildirib ki, təyyarəyə qqəlpələrdən ciddi ziyan dəyib. Bir çox mənbələr fəlakətin səbəbinin Qroznı üzərində Rusiyanın “Pantsir-S1” hava hücumundan müdafiə sistemi tərəfindən atılan yer-hava raketi ola biləcəyini ehtimal edir.

Məlumdur ki, fəlakət baş verən gün Ukrayna pilotsuz təyyarələrindən müdafiə üçün Rusiya hava hücumundan müdafiə sistemləri fəal şəkildə istifadə olunub. Rəsmi mənbələr bildirirlər ki, Rusiya hava limanları təyyarənin təcili enişinə icazə verməkdən imtina edərək, onun Aktauya yönləndirilməsinə səbəb olub.

MH17 fəlakəti ilə paralel

Bu, son on ildə ikinci dəfədir ki, mülki təyyarə Rusiya istehsalı olan raketlərlə vurula bilər. Amsterdamdan Kuala-Lumpura uçan MH17 rusiyayönlü qüvvələr tərəfindən səhvən Ukrayna hərbi təyyarəsi kimi təsbit edilib.