Ərdoğan: “Qarabağ məsələsində Azərbaycanın haqlılığı bəllidir”

Türkiyənin Qarabağla bağlı mövqeyində dəyişiklik etməsi barədə məlumatlara münasibət bildirib

“Qarabağ məsələsi ilə bağlı bizim mövqeyimizdə Azərbaycanın rəsmi mövqeyindən fərqli hər hansı dəyişiklik yoxdur. Biz mövqeyimizi bərabər müəyyənləşdirmişik və bu günə qədər eyni istiqamətdə davam etdirməkdəyik”.

APA-nın Türkiyə xəbər agentliklərinə istinadən verdiyi məlumata görə, bu sözləri Türkiyənin baş naziri Rəcəb Tayyib Ərdoğan bəyan edib. Azərbaycandakı bəzi qəzetlərin Türkiyənin Dağlıq Qarabağ probleminə dair siyasətində dəyişiklik olduğunu yazması ilə bağlı jurnalistlərin sualını cavablandıran R. T. Ərdoğan bu xəbərləri Azərbaycanın daxilindəki bəzi qrupların öz siyasi məqsədləri üçün yaydığını deyib: “Belə bir şey söhbət mövzusu deyil. Biz Azərbaycanın rəsmi mövqeyini bölüşən ölkəyik və indiyə qədər də bu mövqenin arxasında dayanmışıq. Qarabağ məsələsində Azərbaycanın haqlılığı bəllidir və bu, BMT qərarlarında da əksini tapıb”.

Xatırladaq ki, “Azadlıq” radiosunun (“Radio Liberty”) Ermənistan xidməti Türkiyənin Ermənistanla münasibətləri normallaşdırmaq üçün Dağlıq Qarabağla bağlı şərtindən vaz keçdiyi barədə məlumat yayıb.