“Azərbaycanın sülhməramlı əməliyyatlarında iştirakı haqqında” qanun layihəsi ikinci oxunuşda qəbul olunub

Milli Məclisin bu gün keçirilən iclasında “Azərbaycan Respublikasının sülhməramlı əməliyyatlarında iştirakı haqqında” qanun layihəsi ikinci oxunuşda qəbul olunub.

Lent.az-ın xəbərinə görə, iclasda “Bank olmayan kredit təşkilatları haqqında” qanun layihəsi isə üçüncu oxunuşda qəbul edilib.

Parlamentdə “Azərbaycan Respublikasının İnzibati Prosessual Məcəlləsinin təsdiq edilməsi haqqında” Azərbaycan Respublikası Qanununa dəyişiklik edilməsi barədə qanun layihəsi müzakirə edilib. Parlamentin Hüquq siyasəti və dövlət quruculuğu Komitəsinin sədri Əli Hüseynov qanunun 1 sentyabr 2010-cu il tarixdən qəbul olunmasını təklif edib. Bu təklif və “Azərbaycan Respublikasının İnzibati Prosessual Məcəlləsinin təsdiq edilməsi haqqında” Azərbaycan Respublikası Qanununa dəyişiklik edilməsi barədə qanun layihəsi qəbul olunub.

Hazırda iclasda “İnsanın immun çatışmazlığı virusunun törətdiyi xəstəliklə (HİV infeksiyası ilə) mübarizə haqqında” qanun layihəsi müzakirə olunur.

Pərvin ABBASOV