ABŞ-ın Azərbaycandakı səfirliyi yeni viza proseduru həyata keçirəcək

Səfirliyin mətbuat xidmətindən Lent.az-a verilən məlumata görə, dəyişikliyin bir hissəsi olaraq, ərizəçilər viza müsahibəsinə yazılmaqdan əvvəl rüsumu ödəyəcəklər.

Hazırda ABŞ-ın Bakıdakı Səfirliyində viza müsahibəsi üçün yalnız əvvəlcədən yazılmaq lazımdır və viza ərizəçiləri rüsumu müsahibə zamanı ABŞ Səfirliyində ödəyirlər. 27 dekabrdan sonra viza ərizəçiləri rüsumu müsahibəyə yazılan zaman ödəyəcəklər. Yeni prosedurlarla bağlı daha ətraflı məlumat yaxın həftələrdə elan olunacaq.

27 dekabrdan etibarən ərizəçilər gün təyin etmək üçün yeni sistemdən istifadə edə bilərlər və müsahibələr cümə axşamı, 3 yanvar 2013-cü ildən başlayacaq.

ABŞ Səfirliyinin konsulluq şöbəsi həmin tarixdən etibarən 3 yanvar 2013-cü ilədək viza xidmətlərini dayandıracaq. Fövqəladə hallarda səyahət üçün məhdud viza xidmətləri göstəriləcək. Səfirlik vətəndaşlardan müraciətlərini ConsularBaku@state.gov elektron poçtuna göndərməyi xahiş edir.