Qış ayları, xüsusilə yanvar–mart dövrü bir çox insan üçün psixoloji baxımdan daha çətin keçir. Günlər qısalır, gündəlik ritm pozulur, enerji azalır və əhval düşür. İşıq terapiyası, fiziki aktivlik və keyfiyyətli yuxu kömək etsə də, bəzən ən sadə dəstək məhz süfrədən başlayır.
Lent.az xəbər verir ki, araşdırmalara görə omeqa-3 yağ turşularının müntəzəm qəbulu iltihabı azaldır və emosional tarazlığın qorunmasına dəstək olur.
Klinik dietoloq Samanta Piterson və həkim Brunoin Holms Real Simple nəşrinə açıqlamasında bildiriblər ki, omeqa-3 qış mövsümündə xüsusilə vacibdir. Onların sözlərinə görə, bu yağ turşuları beyin fəaliyyətini dəstəkləyir və serotonin səviyyəsinin azalması, iltihabın artması fonunda emosiyaların tənzimlənməsinə kömək edir.
Mütəxəssislər qeyd edirlər ki, omeqa-3 bir neçə istiqamətdə təsir göstərir: beyində iltihabı azaldır, neyronlar arasında əlaqəni gücləndirir və depressiya riskini aşağı salmağa kömək edir. Araşdırmalarda EPA tərkibli əlavələrin depressiya əlamətlərini azaltdığı, xüsusilə də bədəndə iltihab göstəriciləri yüksək olan insanlarda daha təsirli olduğu vurğulanır.
Omeqa-3-ün əsas mənbələri bunlardır:
Yağlı balıqlar - losos, skumbriya, sardina, siyənək, ançous. Həftədə iki dəfə 120 qramlıq porsiya tövsiyə olunur.
Toxum və qoz-fındıq - kətan toxumu, çia, çətənə toxumu və qoz bitki mənşəli omeqa-3 verir. Orqanizm bunu aktiv formaya çevirə bilir.
Yaşıl yarpaqlı tərəvəzlər - ispanaq və keyl az miqdarda omeqa-3 ilə yanaşı, beyin üçün vacib olan maqnezium və B qrupu vitaminləri də ehtiva edir.
Mütəxəssislər vurğulayırlar ki, qidalanmada “inqilab” etməyə ehtiyac yoxdur. Gün ərzində kiçik əlavələr belə böyük fərq yarada bilər. Məsələn, səhərə çia toxumu pudinqi ilə başlamaq, salata qoz əlavə etmək və həftədə iki dəfə yağlı balıq yemək kifayət edə bilər. Civə riskindən narahat olanlar üçün isə sardina və ançous daha təhlükəsiz alternativ sayılır.
Doktor Holmsun fikrincə, omeqa-3-ü qida vasitəsilə qəbul etmək əlavələrdən daha üstün ola bilər. Çünki qidalar əlavə vitamin və minerallarla birlikdə daha yaxşı mənimsənilməni təmin edir.
Gündə minimum 250 mq EPA + DHA qəbul etmək tövsiyə olunur, bəzi ölkələrdə bu göstərici daha yüksəkdir. Hamilə və süd verən analara əlavə DHA lazım ola bilər. Uşaqlar və yaşlılar üçün dəqiq normativlər olmasa da, ehtiyac mövcuddur. Əksər insanlar gündəlik omeqa-3 miqdarını yetərincə almır. Balıq yeməyənlər üçün omeqa-3 əlavələri təhlükəsiz və effektiv seçim hesab olunur
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
