Yüksək təzyiqi olanlar üçün limon suyunun FAYDALARI

Yüksək arterial təzyiq ürəyə daha çox yük qoyur, onun daha intensiv işləməsinə səbəb olur, buna görə də təzyiqin nəzarətdə saxlanması çox vacibdir. Limon suyu yüksək arterial təzyiqin aşağı salınmasında faydalı bir vasitə ola bilər. Vitaminlər, minerallar və bioloji aktiv birləşmələrin yüksək miqdarı sayəsində sitrus meyvələri ürək-damar sisteminə müsbət təsir göstərir.

Lent.az limon suyunun faydalarını təqdim edir:

Arterial təzyiqin nəzarət altında saxlanılması əsasən həyat tərzindən və pəhrizdən asılıdır. Hipotensiv təsiri olan məhsulların, məsələn, limon və onun suyu, pəhrizə daxil edilməsi təzyiqin normallaşmasına kömək edə bilər. Elmi tədqiqatlarda qeyd olunur ki, yüksək arterial təzyiq ürəyə əlavə yük qoyur və onun daha intensiv işləməsinə səbəb olur. Zamanla bu, ürək-damar xəstəliklərinə, infakt və insult kimi ciddi fəsadlara gətirib çıxara bilər. Alimlər sarımsaq və limon suyunun arterial təzyiqə təsirini araşdırıblar. Eksperimentdə 100-dən çox insan iştirak edib və onlar üç qrupa bölünüblər. Birinci qrup hər gün səhər və nahardan sonra 10 qram sarımsaq istehlak edib. İkinci qrup limon suyu içib. Üçüncü qrup isə həkimlər tərəfindən təyin edilmiş standart dərman müalicəsi alıb.

Üç həftə ərzində iştirakçıların təzyiqi müntəzəm olaraq ölçülüb və onların ümumi vəziyyəti qeydə alınıb. Nəticə göstərdi ki, həm sarımsaq, həm də limon suyu arterial təzyiqi aşağı salmağa və iştirakçıların ümumi vəziyyətini yaxşılaşdırmağa kömək edib. Lakin bu iki metod arasında əhəmiyyətli fərqlər müşahidə edilməyib. Mütəxəssislər nəticəyə gəldilər ki, limon suyu və ya sarımsağın istifadəsi hipertoniyası olan insanlara vəziyyətlərini daha effektiv şəkildə nəzarət etməyə kömək edə bilər. Onlar həmçinin təzyiqin müntəzəm izlənməsinin vacibliyini, xüsusən də yaşlılar üçün vurğuladılar. Həkimlər, həmçinin, normal arterial təzyiqin 90/60 – 120/80 mm c.q. arasında olduğunu xatırladılar. Əgər təzyiq 120/80 – 140/90 mm c.q. arasında olarsa, bu, hipertoniyanın inkişaf riski olduğunu göstərə bilər.

Bundan əlavə, alimlər qeyd etdilər ki, pəhrizdəki kiçik dəyişikliklər belə təzyiqin səviyyəsinə əhəmiyyətli dərəcədə təsir göstərə bilər. Sadə və əlçatan vasitələr, məsələn, limon suyu, hipertoniyaya qarşı mübarizədə əlavə bir vasitə ola bilər.