Kərə yağı gündəlik qidalanmada geniş istifadə olunsa da, hər kəs üçün eyni dərəcədə uyğun deyil. Süd zülalına allergiyası, yüksək xolesterini və ürək-damar xəstəlikləri olan şəxslər bu məhsulun istifadəsinə xüsusi diqqət yetirməlidirlər.
Lent.az xarici mediaya istinadən xəbər verir ki, kərə yağında doymuş yağların miqdarı yüksəkdir. Onların həddindən artıq qəbulu qanda lipoproteinlərin, LDL-in səviyyəsini artıra bilər.
Süd zülalına allergiyası olanlar
Kərə yağında süd zülalları qala bildiyindən inək südü zülalına təsdiqlənmiş allergiyası olan şəxslərdə allergik reaksiya yarana bilər. Bu reaksiyalar səpgi, qaşınma, şişkinlik, qusma və digər əlamətlərlə özünü göstərə bilər.
Belə şəxslər məhsulların tərkibini diqqətlə yoxlamalı və həkimin tövsiyələrinə əməl etməlidirlər.
Xolesterini yüksək olanlar
Kərə yağının tərkibindəki doymuş yağlar LDL səviyyəsinin yüksəlməsinə səbəb ola bilər. Buna görə analizlərində bu göstəricisi yüksək olan şəxslər qidalanmalarını həkimlə müzakirə etməlidirlər.
Lakin yüksək xolesterini olan hər kəsə kərə yağını tamamilə qadağan etmək düzgün yanaşma deyil. Əsas məsələ ümumi qidalanma, doymuş yağların miqdarı və onların hansı məhsullarla əvəz edilməsidir.
Amerika Ürək Assosiasiyası doymuş yağların əvəzinə daha çox doymamış yağlara üstünlük verməyi tövsiyə edir. Bu baxımdan yeməklərin hazırlanmasında zeytun və günəbaxan yağından istifadə etmək, rasiona qoz-fındıq, toxumlar və balıq daxil etmək mümkündür.
Ürək-damar xəstəliyi olanlar
Ürəyin işemik xəstəliyi olan, infarkt və ya insult keçirən şəxslər üçün qidalanma sonrakı ağırlaşmaların qarşısının alınmasında mühüm rol oynayır.
Bu zaman rasiondakı doymuş yağların ümumi miqdarına nəzarət etmək lazımdır. Kərə yağının tamamilə çıxarılıb-çıxarılmaması və hansı miqdarda istifadə olunması fərdi tövsiyələrdən asılıdır.
Çəkisinə nəzarət edənlər
Kərə yağı yüksək kalorili məhsuldur. Yağlılıq dərəcəsindən asılı olaraq onun 100 qramında təxminən 700–750 kilokalori olur.
Buterbroda, sıyığa, kartofa və digər yeməklərə müntəzəm olaraq çox miqdarda kərə yağı əlavə etmək gündəlik kalori qəbulunu artıra bilər. Buna görə çəkisinə nəzarət etmək istəyənlər porsiyaların ölçüsünü nəzərə almalıdırlar.
Nə qədər yemək olar?
Hər kəsə uyğun vahid norma yoxdur. Məqalədə sağlam yetkin insanın balanslaşdırılmış qidalanmasında kiçik porsiyanın yer ala biləcəyi bildirilir. Məsələn, buterbroda və ya bir porsiya sıyığa əlavə edilən 5–10 qram kərə yağı kiçik porsiya nümunəsidir, hamı üçün gündəlik norma deyil.
Təkcə kərə yağını azaltmaq kifayət etməyə bilər. Yağlı ət, qaymaq, yağlı pendir, kolbasa və bəzi un məmulatları da doymuş yağ mənbəyidir. Buna görə rasion bütövlükdə qiymətləndirilməlidir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
