Cəmi 2 inqredientlə hazırlanan sadə dondurma RESEPTİ

Bu dondurmanı hazırlamaq üçün heç bir aşpazlıq bacarığı lazım deyil. Nəticədə elə yumşaq və ləzzətli bir dondurma əldə edəcəksiniz ki, mağazadakı heç biri onunla rəqabət apara bilməz.

Lent.az bu dondurma reseptini təqdim edir:

İsti yay günlərində bir kasa dondurma bir çoxları üçün əsl nicatdır. Düzdür, dondurmanı mağazadan almaq hər zaman mümkündür, amma Express yazır ki, elə bir sadə resept var ki, onu hazırladıqdan sonra mağazaya getmək istəməyəcəksiniz.

Bu reseptin gözəlliyi ondadır ki, çox doyumlu və kremvari bir desert əldə edirsiniz. Hazırlanması inanılmaz dərəcədə asandır və istəyə görə dadını dəyişmək də mümkündür. Üstəlik, cəmi 2 inqredient tələb olunur.

Evdə hazırlanmış dondurma üçün lazım olan inqredientlər:

Təxminən 470 millilitr yağlı çalınan qaymaq

Bir banka (təxminən 400 qram) qatılaşdırılmış süd (şirin)

Hazırlanma qaydası

Qaymağı soyudulmuş şüşə və ya metal qabda mikserlə yumşaq zirvələr yaranana qədər çalın. Üzərinə qatılaşdırılmış süd əlavə edin və kütlə qalın və vahid konsistensiya alana qədər yenidən çalın.

Alınan qarışığı dayaz bir qaba tökün, üzərini streç plyonka ilə örtün və tam donması üçün təxminən 6 saatlıq dondurucuya qoyun.

Nuş olsun!