Nizami Gəncəvi Fransada anıldı

Heydər Əliyev Fondunun təşkilatçılığı və Azərbaycanın Fransadakı səfirliyinin dəstəyi ilə noyabrın 13-də Parisdəki Azərbaycan Mədəniyyət Mərkəzində Nizami Gəncəviyə həsr edilmiş tədbir olub. Lent.az-ın məlumatına görə, Azərbaycanın Fransadakı səfiri Elçin Əmirbəyov bildirib ki, şairin həyat və yaradıcılığı ilə bağlı Parisin Məktublar və Əlyazmalar Muzeyində sərgi də təşkil edilib.

E. Əmirbəyov əlavə edib ki, Nizami Gəncəvinin 870 illiyi ilə əlaqədar Fransada üç tədbirin keçirilməsi planlaşdırılır: “Artıq sərgi və konsert təşkil edilib. Bir neçə gündən sonra Strasburqda böyük mərasimin keçirilməsi nəzərdə tutulub”.

Səfir Heydər Əliyev Fondu tərəfindən şairin həyat və yaradıcılığına dair əsərlərinin yenidən nəşr olunduğunu diqqətə çatdırıb.

Fransanın Yon regionu Ali Şurasının sədri Andre Vilye çıxışında zəngin tarixə və mədəniyyətə malik Gəncə şəhərinə dəfələrlə səfər etdiyini, Nizami Gəncəvi muzeyinə baş çəkdiyini, ötən il dahi şairin 870 illik yubileyi ilə bağlı tədbirlərdə iştirak etdiyini xatırladıb.

Senatın Qafqaz üzrə dostluq qrupunun sədr müavini senator Jeanny Lorgoeux Nizami Gəncəvinin 870 illik yubileyi münasibətilə Azərbaycan xalqını təbrik edib və şairin Şərq ədəbiyyatında oynadığı mühüm roldan söhbət açıb.

Tədbirdə incəsənət ustaları konsert proqramı ilə çıxış ediblər. Qeyd edək ki, konsertdə senatorlar, deputatlar, tanınmış aktyorlar, dövlət rəsmləri, fransız ictimaiyyətinin nümayəndələri, akkreditə olunan diplomatik korpusun əməkdaşları, diaspora təmsilçiləri və tələbələr iştirak ediblər.