Nərgiz Cəlilova dəvət gözləyir

“Heç bir əyləncə, televiziya, internet teatrı əvəzləyə bilməz”. Lent.az-ın məlumatına görə, bunu tanınmış teleaparıcı Nərgiz Cəlilova ikinci dəfə keçirilən “Gənclərin II Ümumrespublika Teatr festivalı”ndan danışarkən deyib. Sözügedən festivalı yüksək qiymətləndirən teleaparıcı bildirib ki, festival teatrın inkişafına təkan verəcək: “Artıq ikinci dəfədir ki, bu festival təşkil olunur. Keçən il də mən də bu festivalda iştirak edirdim və çox məmnun qaldım. Hamılıqla bu festivalı təqdir etdik. Bu festivalın ən böyük əhəmiyyəti həm də ondan ibarət idi ki, bölgələri əhatə edirdi. Bölgə gənclərinə bu festivalda öz sözlərini demək üçün şərait yaradıldı. Eyni zamanda, teatrın inkişafı və gənclərə dəstək baxımından bu festivalın əhəmiyyəti danılmazdır. Buna görə mən təşkilatçılara və başda festivalın ideya rəhbəri, millət vəkili Jalə xanım Əliyevaya minnətdarlığımı ifadə edirəm”.

Tanınmış aparıcı növbəti ildə keçiriləcək festivalda da iştirak etmək üçün dəvət gözlədiyini deyib: “Dəvət gözləyirəm və böyük məmnuniyyətlə, bu festivala qatılardım. Teatr sənəti hər zaman olub və olacaq da. Heç bir əyləncə, televiziya, internet teatrı əvəzləyə bilməz. Teatr canlı ünsiyyətdir. Ekologiya mövzusuna həsr olunmuş "Gənclərin II Ümumrespublika Teatr Festivalı"nı alqışlayıram. Bu festivalın davamlı olmasını arzulayıram. Onu da deyim ki, bu festival mövzu seçimi baxımından da maarifləndirici rol oynayır”.

Qeyd edək ki, Layihənin ideya müəllifi, millət vəkili Jalə Əliyeva, icraçı direktoru Ramil Ağasıyevdir. Layihənin informasiya dəstəyi Guney.az və Lent.az xəbər portalları və Araz FM radiosudur.