Vasif Adıgözəlovun yubileyi keçiriləcək

Oktyabrın 31-də Azərbaycan Dövlət Opera və Balet Teatrında Azərbaycanın xalq artisti, bəstəkar Vasif Adıgözəlovun 80 illik yubileyi qeyd olunacaq. Mədəniyyət və Turizm Nazirliyindən Lent.az-a verilən məlumata görə, bu münasibətlə teatrda bəstəkarın “Natəvan” operasının tamaşası səhnəyə qoyulacaq.

Tamaşanın musiqi rəhbəri və dirijoru xalq artisti, professor Yalçın Adıgözəlov, quruluşçu rejissoru Azərbaycan və Özbəkistanın xalq artisti Firudin Səfərov, quruluşçu rəssamı xalq rəssamı Tahir Tahirovdur. Yubiley tamaşada teatrın aparıcı solistlərindən əməkdar artist Zemfira İsmayılova (Natəvan), xalq artistləri Azər Zeynalov (Xasay bəy), Şahlar Quliyev (Qasım bəy Zakir), Mənsum İbrahimov (Xanəndə oğlan), Nəzakət Teymurova (Xanəndə qız) və başqaları çıxış edəcəklər.

Qeyd edək ki, “Natəvan” operası teatrda ilk dəfə 2003-cü ildə səhnələşdirilib. Libretto müəllifi Nazim İbrahimovdur. Operada görkəmli Azərbaycan şairəsi Xurşid Banu Natəvanın həyat və fəaliyyəti, onun yaradıcılığı fonunda Qarabağda uzun əsrlər boyu hakimiyyət uğrunda gedən mübarizələr, Qarabağın insanları, ab-havası, musiqi və rəqsləri təsvir olunub.