“Sarvan” qrupu “Qızıl Delfin-2011”in laureatı olub

Diasporla İş üzrə Diaspor Komitəsinin mətbuat xidmətindən Lent.az-a verilən məlumata görə, festivalda Gürcüstanın Marneuli şəhərində fəaliyyət göstərən Azərbaycanlıların Mədəniyyət Mərkəzinin nəzdindəki “Sarvan” folklor rəqs qrupu da iştirak edib. Festivalın açılışında Gürcüstan prezidenti Mixail Saakaşvili iştirakçılara ürək sözlərini çatdırıb. Festivalın açılışında Gürcüstanın mədəniyyət və mədəni abidələrin qorunması naziri N.Rurua, Acarıstan Muxtar Respublikasının başçısı L.Varşalomidze və mədəniyyət naziri Q.Abduladze, Batuminin meri R.Çxaidze, festivalın direktoru, Acarıstan musiqi cəmiyyətinin rəhbəri Nodar Saqinadze və digər rəsmilər iştirak ediblər.

Festivalda Azərbaycandan gələn “Qarabağ bülbülləri ” muğam ansamblı da iştirak edib. Tədbirə qatılan Azərbaycanlıların Mədəniyyət Mərkəzinin nəzdində fəaliyyət göstərən “Sarvan” folklor rəqs qrupu “Odlar yurdu”, “Yallı” və digər Azərbaycan xalq rəqslərini nümayiş etdirib. Qrupun çıxışları böyük maraq və alqışlarla qarşılanıb.

Festivalın yekununda “Sarvan” folklor rəqs qrupun festivalın laureatı olub və qrupun üzvləri diplomlarla təltif olunub. Qrupun bədii rəhbəri Cəmilə Məmmədova isə diplom və medala layiq görülüb.