“Eurovision-2011” qalibləri vətəndə gül-çiçək və bayraqla qarşılandılar

“Eurovision-2011”in qalibləri Eldar Qasımov və Nigar Camal bu gün səhər saatlarında vətənə qayıdıblar. Lent.az-ın əməkdaşı da qalibləri qarşılayanlar arasında olub. Onun verdiyi məlumata görə, qaliblər “Eurovision-2011”dəki Azərbaycan nümayəndə heyəti ilə birlikdə Bakıya dönüblər.

Qaliblərimizi qarşılamaq üçün gecə saatlarından etibarən pərəstişkarlar Heydər Əliyev adına Hava Limanına toplaşıblar. Onların əllərində Azərbaycan bayrağı və gül-çiçək dəstələri olub.

APA-nın Düsseldorfda “Eurovision-2011” müsabiqəsini izləmək üçün ezam olunmuş xüsusi müxbiri də həmin təyyarə ilə geri dönüb. Onun bildirdiyinə görə, qalib təmsilçilərimiz üçün AZAL Dövlət Konserni tərəfindən xüsusi təyyarə ayrılıb.

Azərbaycanı “Eurovision-2011” yarışmasının qalibi edən təmsilçilərimiz üçün AZAL tərəfindən hazırlanmış tort təyyarədə kəsilib. Xüsusi çoşqu ilə keçən səfər barədə APA-ya danışan Eldar Qasımov bildirib ki, o, ölkəyə belə qələbə ilə qayıtdığına görə, çox xoşbəxtdir: “Biz bu xoşbəxtliyi, sevinci Bakıya yaşatdığımız üçün çox məmnunuq. Bu uğurlarımızı davam etdirməyə çalışacağıq”.

Qaliblərimizi qarşılayanlar arasında millət vəkilləri Ceyhun Osmanlı və Fuad Muradov da olub.

Fanatları “Eurovision” təmsilçimizə çoxlu güllər, hədiyyələr təqdim ediblər.

Qeyd edək ki, qaliblərlə birgə Almaniyadakı Azərbaycan nümayəndə heyəti, gənclər və idman naziri Azad Rəhimov başda olmaqla, geri dönüblər.

Qarşılamaya gələnlərin avtomaşınları “Eldar və Nigar” sözləri ilə bəzənib. Eldar və Nigar oraya toplaşanlar tərəfindən böyük sevgi və alqışlarla qarşılanıb.

Qaliblər izdihamın sıxl olması səbəbindən jurnalistlərin suallarını cavablandırmamış məkanı tərk ediblər.

Lalə Yusifqızı