Müslüm Maqomayevin xatirəsinə həsr olunmuş konsert keçirilib
18 avqust 2009 13:30 (UTC +04:00)

Müslüm Maqomayevin xatirəsinə həsr olunmuş konsert keçirilib

Tanınmış Azərbaycan müğənnisinin xatirəsi anılıb

Heydər Əliyev Fondunun dəstəyi ilə Azərbaycanda ilk dəfə olaraq keçirilən Qəbələ Beynəlxalq Musiqi Festivalı davam edir. Festivalda müxtəlif ölkələrdən dəvət olunmuş virtioz pianoçular öz məharətlərini nümayiş etdirirlər. Lent.az-ın məlumatına görə, festival çərçivəsində artıq 3 gündür ki, Qəbələ rayon Mədəniyyət evində gənc pianoçuların beynəlxalq müsabiqəsi keçirilir. Avqustun 17-də müsabiqənin II turuna start verilib. Tura bu gün - avqustun 18-də yekun vurulacaq. Avqustun 19-da müsabiqənin final mərhələsi keçiriləcək və qaliblər mükafatlandırılacaq.

Avqustun 17-də axşam saat 21-də, musiqi festivalının proqramına uyğun olaraq, Qəbələdəki “Qafqaz Resort” otelinin qarşısında açıq havada dünya şöhrətli müğənni Müslüm Maqomayevin xatirəsinə həsr olunmuş konsert olub. Əvvəlcə Müslüm Maqomayevin xatirəsi bir dəqiqəlik sükutla yad olunub.

Tədbirdə qeyd olunub ki, avqustun 17-si dünya şöhrətli Azərbaycan müğənnisi Müslüm Maqomayevin doğum günüdür. 67 yaşında dünyasını dəyişən sənətkar bu gün də sevilə-sevilə xatırlanır. Təkrarolunmaz bariton səsi ilə səhnələri fəth edən Müslüm Maqomayev Azərbaycan mədəniyyətini, musiqisini dünyaya tanıdıb.

Konsetrdə solistlər Fərhad Bədəlbəylinin və Murad Adıgözəlzadənin, dirijor Dmitri Yablonskinin müşayiəti ilə İsrailin məşhur Ranaana Simfonik Orkestri C.Qerşvinin və L.Bernstaynın əsərlərini səsləndirib.

Xatırladaq ki, avqustun 20-də pianoçular müsabiqəsinin münsiflər heyətinin qala konserti olacaq. Ayın 21-də isə Mənsum İbrahimov, Aygün Bayramova, Elçin Həşimov və Elnur Əhmədovun iştirakı ilə muğam axşamı təşkil ediləcək.

Festivalın təntənəli bağlanışı avqustun 22-də olacaq.
# 820

Oxşar yazılar