Azərbaycanlı gənc pianoçu Suriyada keçirilən festivaldan uğurla qayıdıb
03 avqust 2009 16:30 (UTC +04:00)

Azərbaycanlı gənc pianoçu Suriyada keçirilən festivaldan uğurla qayıdıb

Bakı şəhəri R.Hacıyev adına 15 nömrəli Uşaq Musiqi Məktəbinin şagirdi Kamil Həsənov ötən həftə Dəməşq şəhərində keçirilmiş Solhi Al Vadi adına Gənc pianoçuların II beynəlxalq müsabiqəsində iştirak edib. Mədəniyyət və Turizm Nazirliyindən Lent.az-a verilən məlumata görə, pianoçu uğurlu çıxış nümayiş etdirib 3-cü yer tutaraq, müsabiqənin laureatı adına və pul mükafatına layiq görülüb.

Azərbaycan, Amerika Birləşmiş Ştatları, Birləşmiş Ərəb Əmirlikləri, Bosniya və Hersoqovina, Çin, Kanada, Suriya, Tunis və Ermənistandan 60-dan çox gənc pianoçunun iştirak etdiyi müsabiqədə Kamil Həsənov ölkəmizin yeganə təmsilçisi olub. Gənc pianoçu Kamil Həsənov Suriya Ərəb Respublikasındakı Azərbaycan Səfirliyində qəbul edilib və qiymətli hədiyyə ilə mükafatlandırılıb.

Qeyd etmək lazımdır ki, bu qələbə gənc pianoçunun ilk nailiyyəti deyildir. Kamil Həsənov cari ilin may ayında Gürcüstanın Tbilisi şəhərində keçirilmiş Gənc pianoçuların IV beynəlxalq müsabiqəsində də müvəffəqiyyətlə çıxış edərək müsabiqənin laureatı adına və bürünc medala layiq görülüb.

Lalə Yusifqızı
# 413

Oxşar yazılar