Üzeyir Hacıbəylinin “Ləzgi rəqsi”nin partiturasının nəşri təqdim olundu –

Sentyabr 24-də Üzeyir Hacıbəylinin 125 illiyinə həsr olunmuş Beynəlxalq Musiqi Festivalı çərçivəsində “Ləzgi rəqsi”nin ilk nəşrinin təqdimat mərasimi keçirilib. Lent.az-ın məlumatına görə, mərasimdə mədəniyyət və turizm nazirinin müavini Sevda Məmmədəliyeva çıxış edərək nəşri önəmli hadisə kimi qiymətləndirib. Nazir müavini bildirib ki, bu partitura musiqi kollektivləri üçün böyük bir hədiyyədir.

Musiqi Mədəniyyəti Dövlət Muzeyinin direktoru və nəşrin redaktoru, sənətşünaslıq namizədi Alla Bayramova məlumat verib ki, Üzeyir bəy “Ləzgi rəqsi”ni 1932-ci ildə yazıb. Muzeyə isə əsər 1972-ci ildə dirijor Əşrəf Həsənovun arxiv materialları əsasında daxil olub: “Ehtimal olunur ki, əsəri Əşrəf Həsənova Üzeyir bəy özü verib. Üzeyir bəyin özünün sağlığında rəqsin ifa olunub-olunmaması isə məlum deyil. İlk dəfə bir neçə il öncə muzeydə keçirilən “Səslər və kəşflər” tədbirində Gülağa Zeynalovun rəhbərlik etdiyi orkestr ifa edib”.

Çıxışlardan sonra Mədəniyyət və İncəsənət Universitetinin xalq çalğı alətləri orkestrinin (bədii rəhbəri Gülağa Zeynalov) ifasında Üzeyir Hacıbəylinin “Ləzgi rəqsi” təqdim olunub. “Koroğlu” uvertürası, “Sevgili canan“ romansı, “Qaragöz”, “Sən o yanda, mən bu yanda” mahnıları səslənəcək, “Günay” Uşaq Teatrı “Arşın mal alan“ musiqi komediyasından fraqmentlər səsləndirilib.

Bundan başqa, muzeyin hazırladığı Üzeyir Hacıbəylinin həyat və yaradıcılığına həsr olunmuş sərgi və slayd şou da nümayiş etdirilib.

Xəyalə