“Varlı qadın” Krımda

Tanınmış dramaturq Əli Əmirlinin “Varlı qadın” komediyası Ukraynanın Krım Muxtar Respublikasında tamaşaya qoyulub. Dramaturqun Lent.az-a verdiyi xəbərə görə, sentyabrda Başqırdıstanın Ufa şəhərində keçirilən Beşinci “Tuqanlıq” Beynəlxalq Teatr festivalında Dağıstanın Kumık Dövlət Musiqili Dram teatrı kollektivinin ifasında iki nominasiya üzrə əsas mükafata layiq görülən “Varlı qadın” komediyası bu dəfə Krım Muxtar Respublikasının paytaxtı Simferopol şəhərində yerləşən 110 yaşlı Krım-Tatar Akademik Musiqili Dram Teatrında nümayiş olunub.

Noyabrın 5-də və 6-da premyerası baş tutan tamaşanın quruluşçu rejissoru Ukraynanın əməkdar artisti Rinat Bektaşevdir. Komediyanın növbəti nümayişi noyabrın 20-də olacaq. “Varlı qadın” Krım teatrının Azərbaycan dramaturgiyasına üçüncü müraciətidir. Bundan əvvəl teatr Üzeyir Hacıbəyovun “Arşın mal alan” operettasını və Elçinin “Şekspir” əsərini “Xəstə könül” adı ilə tamaşaya qoyub.

Onu da qeyd edək ki, Əli Əmirlinin “Varlı qadın”ı ölkəmizin əksər teatrlarında, o cümlədən Akademik Milli Dram Teatrında, habelə Tacikistan, Qırğızıstan, Qazaxıstan, Rusiya və Özbəkistanın bir sıra teatrlarında tamaşaya qoyulub.