Təbrizdəki muğam konserti Tehranda da davam edəcək

Tanınmış xanəndə Nasir Ətapur bu il avqustun 11-də İranın Şərqi Azərbaycan vilayətində baş vermiş dağıdıcı zəlzələdən zərər çəkmiş əhaliyə yardım etmək məqsədilə Təbrizdə xeyriyyə konserti ilə çıxış edib.

Lent.az-ın Azərtac-a istinadən məlumatına görə, o, bu nəcib işini oktyabrın 25-də və 26-da Tehranın "Vəhdət" konsert və teatr salonunda da davam etdirmək niyyətindədir.

Konsertə İran rəsmiləri, Tehranda fəaliyyət göstərən diplomatik korpusun nümayəndələri, ölkə ictimaiyyətinin tanınmış simaları, o cümlədən zəlzələ bölgəsinə yardım edən şirkətlərin rəhbərləri, şöhrətli idmançılar və sənət adamları dəvət olunub.

Xanəndəni Azərbaycan muğam musiqi qrupu - tarda Etibar Quliyev, kamançada Yaşar Cavadpur, nağarada Rza Nəbahət, balabanda Cəlil Həmidi müşayiət edəcəklər.

Konsertlə bağlı hazırlanmış dəvətnamələrdə və biletlərin üstündə xüsusi olaraq qeyd olunub ki, Heydər Əliyev Fondunun 2007-ci ildə təşkil etdiyi Beynəlxalq Muğam Müsabiqəsinin qaliblərindən Nasir Ətapur ötən dövrdə böyük yaradıcılıq məktəbi keçib. O, Azərbaycan Milli Konservatoriyasının magistridir.

Eyni məqsədlə Təbrizdə təşkil olunan, İran rəsmilərinin, Azərbaycan Respublikasının və Türkiyənin Təbrizdəki baş konsulluqlarının kollektivlərinin də qatıldıqları konsertdə 1200 nəfərə yaxın tamaşaçı iştirak edib.