Növbəti “Eurovision” həyəcanı başlayır

Müsabiqənin Azərbaycan üzrə təşkilatçı və yayımçısı İctimai Teleradio şirkəti 2013-ci ildə bu müsabiqədə ölkəmizin təmsilçisini müəyyən etmək üçün milli seçim turuna başlayıb.

Lent.az-ın İTV-yə istinadən verdiyi xəbər görə, yaşı 16-dan yuxarı olan, öz istedadına və peşəkarlığına güvənən şəxsləri müsabiqəyə dəvət olunur. Bildirilir ki, müsabiqəyə qatılan şəxslər gözəl səs , rəqs etmək və səhnə mədəniyyətinə malik olmalıdırlar.

İştirak etmək istəyənlər oktyabrın 15-dən 25-dək İctimai Televiziyanın 406-cı otağındakı Təşkilat Komitəsinə müraciət edə bilərlər.

Hər bir iştirakçı müsabiqəyə qatılmaq üçün 3 ədəd müxtəlif rakursdan çəkilmiş şəkil, şəxsiyyət vəsiqəsinin surətini və xüsusi anketi təqdim etməlidir. Anket formasını İTV-nin saytından əldə etmək mümkündür.

Əlaqə telefonları: 404 11 62

Qeyd edək ki, Azərbaycan bu müsabiqəyə ilk dəfə 2008-ci ildə qoşulub. Həmin il ölkəmizi Samir Cavadzadə və Elnur Hüseynov dueti təmsil edib. 2009-cu ildə Moskvanın “Olimpiysk” kompleksində Aysel və Araş “Always” mahnısı ilə ölkəmizin adını üçüncü pilləyə yüksəldib. Norveçin paytaxtı Osloda keçirilən “Eurovision-2010” yarışmasında isə Səfurə Əlizadə “Drip drop” mahnısını ifa edib. Təmsilçimiz bu çıxışı ilə beşinci yerə çıxıb. 2011-ci ildə Almaniyanın Düsseldorf şəhərində “Esprit arena”da baş tutan “Eurovision-2011”də Azərbaycan Eldar Qasımov və Nigar Camalın “Running scared” mahnısı ilə birinci yerə çıxaraq müsabiqəni Azərbaycana gətirib. 2012-ci ildə Bakıda keçirilən müsabiqədə ölkəmizi Səbinə Babayeva təmsil edərək, 4-cü pillədə yer tutub. Bakıda keçirilən müsabiqənin qalibi İsveç olub.

Beləliklə, 2013-cü ildə “Eurovision” Mahnı Müsabiqəsi İsveçin Malmö şəhərində keçiriləcək.

Jalə