Bakıda Rihanna fırtınası–FOTOLENT

Oktyabrın 6-da dünya şöhrətli müğənni, R&B şahzadəsi, beynəlxalq mükafatların, o cümlədən iki “Qremmi” mükafatının sahibi Rihanna Bakıda konsert proqramı ilə çıxış edib.

Lent.az-ın məlumatına görə, “Bakı Kristal Zalı”nda təşkil olunan konsert anşlaqla keçib.

Konsert proqramında səhnəyə ilk olaraq Azərbaycanda ilk Video Blogger adını daşıyan, istedalı müğənni Gültəkin Qaradağlı çıxıb. YouTube-də şəxsi kanalı ilə xarici və yerli mahnıların coverlərini gitara ilə ifa edən Gültəkin,səhnədə bir çox məşhurların repertuarından mahnılar oxuyub.

Zalda böyük bir coşğu yaradan həmyerlimizdən sonra səhnəyə rəqs qrupu çıxıb. Bir neçə rəqs nömrəsindən sonra «DJ Magnum»-un 15 dəqiqəlik çıxışı olub.

Onun ardınca səhnəyə “Natiq” ritm qrupu öz musiqi nömrəsi ilə çıxıb. Qrupun ifasında “Bayatı-Şiraz”, “Sarı gəlin” və milli musiqilərimizdən başqa nümunələr ifa olunub.

Tamaşaçıların səbrizlikə gözlədiyi an isə saat 22:50-də yetişdi. Dünya şöhrətli müğənni Rİhanna səhnədə göründü. “Bakı, mən səni sevirəm” deyərək tamaşaçılara müraciət edən müğənni qonaqlara təşəkkür etdi: “Sağol, Bakı. Mən indi inanıram buradayam. Həm də inanıram ki, bizim bir daha da görüşmək imkanımız olacaq”.

Amerikalı müğənni konsertinə gələn qonaqların coşğusundan razı qaldığını da deyib: “Sizin enerjili olmağınız mənim çox xoşuma gəldi”.

Daha sonra müğənni fanatları ilə birgə özünün hit mahnılarını səsləndirib. Xüsusi işıq effektləri ilə işıqlandırılmış səhnədə çıxış edən Rihanna sonda səhnəyə enərək, fanatları ilə əlbəəl görüşüb.
23 yaşlı amerikalı müğənninin çıxışı bir saat boyunca davam edib.

Qeyd edək ki, konsert Azərbaycan Respublikası Dövlət Neft Şirkətinin maliyyə dəstəyi, “Universal Music Group”un Azərbaycandakı nümayəndəsi olan “Omnikomo Music Group” şirkətinin təşkilatçılığı ilə gerçəkləşib.

Dünya şöhrətli ulduzun şousu yüksək keyfiyyətli musiqinin təbliğatı və musiqi piratçılığı ilə mübarizə çərçivəsində keçirilib.

Jalə Məmmədli