Müslüm Maqomayev adına beynəlxalq müsabiqə keçiriləcək

Mədəniyyət və Turizm Nazirliyinin mətbuat xidmətindən Lent.az-a verilən məlumata görə, "Müslüm Maqomayevin Mədəni-Musiqi İrsi Fondu"nun təşkil edəcəyi, dünya şöhrətli müğənni və bəstəkarın 70 illik yubileyinə həsr olunacaq müsabiqədə vokalçılar klassik janrla yanaşı, estrada sahəsində də qabiliyyət və bacarıqlarını göstərəcəklər. Seçim mərhələsində müxtəlif ölkələrdən olan istedadlı vokalistlər dinlənilib və ən yaxşıları münsiflər heyəti tərəfindən müsabiqədə iştirak etməyə seçiliblər.

İştirakçılar arasında Rusiya, Azərbaycan, Gürcüstan, Almaniya, ABŞ, Şimali Koreya, Monqolustan, Özbəkistan və Ukraynadan olan musiqiçilər yer alacaq.

Həmçinin avqustun 5-də "Krokus Siti Holl" səhnəsində görkəmli müğənni və bəstəkarın pərəstişkarlarına "Sən mənim nəğməmsən. Böyük müğənniyə həsr olunur..." adlı konsert proqramı təqdim olunacaq. Konsertdə Müslüm Maqomayevin dostları və həmkarları onun məşhur mahnılarını ifa edəcəklər.