Niyə gündüz səma mavi, gün batanda qırmızıya çevrilir: fenomenin sadə izahı

Göy üzünün mavi görünməsi okeanların rəngini əks etdirməsi ilə bağlı deyil. Bunun səbəbi Günəş işığının atmosferdə səpələnməsidir.

Lent.az xarici mediaya istinadla xəbər verir ki, ağ görünən Günəş işığı müxtəlif rənglərin birləşməsindən ibarətdir. Bu işıq atmosferə daxil olduqda havadakı molekullar onu müxtəlif istiqamətlərə səpələyir.

Niyə məhz mavi rəng görürük?

Atmosferdəki azot və oksigen molekulları qısa dalğalı mavi işığı uzun dalğalı qırmızı işıqdan daha güclü səpələyir. Bu hadisə Reley səpilməsi adlanır.

Gündüz səmanın müxtəlif istiqamətlərinə baxanda gözümüzə həmin səpələnmiş işıq çatır. Buna görə göy üzünü mavi görürük.

Gün batanda nə dəyişir?

Günəş üfüqə yaxınlaşdıqca işığın atmosferdə keçdiyi yol uzanır. Mavi işığın böyük hissəsi yolboyu müxtəlif istiqamətlərə səpələnir. Gözümüzə birbaşa çatan Günəş işığında isə qırmızı və narıncı çalarlar üstünlük təşkil edir.

Bu səbəbdən Günəş həm doğarkən, həm də batarkən qırmızımtıl görünə bilər. Havadakı toz və digər xırda hissəciklər də gördüyümüz rənglərə təsir göstərir.

Marsda isə günbatımı mavidir

Marsda mənzərə fərqlidir. Planetin atmosferindəki incə toz hissəcikləri işığı Yerdəki hava molekullarından fərqli şəkildə səpələyir. Gündüz səma qırmızımtıl, günbatımı zamanı isə Günəşin ətrafı mavi çalarlarda görünür.

Bu, axşam işığın daha az tozdan keçməsi ilə bağlı deyil. Əksinə, üfüqə yaxınlaşan Günəşin işığı daha çox tozun arasından keçir və hissəciklərin işığı səpələmə xüsusiyyətləri mavi rəngi həmin istiqamətdə daha nəzərəçarpan edir.