Dünyanın ən gözəl sözü seçildi - mənası insanı heyrətləndirir

Beynəlxalq münsiflər heyəti ilk dəfə dünyanın ən gözəl sözünü müəyyənləşdirib. Qalib Yeni Zelandiyanın yerli xalqı olan maorilərin dilindəki qeyri-adi “kaitiakitanga” sözü olub. Bu söz ekspertləri yalnız səslənməsi ilə deyil, dərin mənası ilə də təsirləndirib.

Lent.az xarici KİV-ə istinadən xəbər verir ki, müsabiqəni xarici dil öyrənmə platforması “Babbel” təşkil edib. Qiymətləndirmə zamanı sözlərin ahəngdar səslənməsi, mədəni dəyəri, mənasının unikallığı və müasir dünya üçün aktuallığı nəzərə alınıb. “Kaitiakitanga” məhz bu xüsusiyyətlərin cəminə görə yüzlərlə digər sözü qabaqlayıb.

“Kaitiakitanga” nə deməkdir?

Bu sözü Azərbaycan dilinə bir sözlə dəqiq tərcümə etmək demək olar ki, mümkün deyil. Maori mədəniyyətində o, təbiətə, torpağa, suya və bütün canlılara məsuliyyətlə qayğı göstərmək mənasını verir. Burada söhbət yalnız ətraf mühitin qorunmasından getmir. Bu anlayış insanın təbiətin sahibi deyil, onun ayrılmaz hissəsi olduğu dünyagörüşünü ifadə edir.

“Kaitiakitanga” hər nəslin ətraf aləmi gələcək nəsillər üçün qorumaq məsuliyyətini simvolizə edir. Münsiflərin fikrincə, qlobal ekoloji problemlərin artdığı dövrdə bu ideya xüsusi əhəmiyyət daşıyır.

Qalib necə seçilib?

Təşkilatçıların məlumatına görə, yekun səsvermədən əvvəl sosial şəbəkələrdə, dil forumlarında və müxtəlif onlayn platformalarda aparılan minlərlə müzakirə təhlil edilib. Final mərhələsinə dünyanın 75-dən çox dilindən 223 söz seçilib. Daha sonra beynəlxalq münsiflər heyəti əsas qalibi müəyyənləşdirib.

Finala düşən digər gözəl sözlər

“Kaitiakitanga” ilə yanaşı, dərin mədəni məna daşıyan başqa sözlər də ən gözəl sözlər siyahısına daxil edilib.

“Saudade” portuqal dilində itirilmiş və ya əlçatmaz bir şey üçün duyulan həzin həsrəti ifadə edir.

“İkigai” yapon dilində həyatın mənası və ya insanın hər səhər oyanmasına səbəb olan məqsəd deməkdir.

“Hiraeth” uels dilində artıq qayıtmağın mümkün olmadığı evə və ya məkana duyulan nostaljini bildirir.

“Ubuntu” zulu dilində insanlıq, qarşılıqlı hörmət və birlik fəlsəfəsini ifadə edir.

“Luftmensch” isə idiş dilində maddi dəyərlərdən daha çox ideyalar və xəyallarla yaşayan insan mənasını verir.

Təşkilatçılar bildiriblər ki, müsabiqənin məqsədi yalnız ahəngdar səslənən bir sözü seçmək deyil, həm də dünya dillərinin zənginliyini nümayiş etdirməkdir. Çünki bəzi anlayışları bir sözlə başqa dilə çevirmək mümkün olmur. Onlar müxtəlif xalqların özünəməxsus düşüncə tərzini, tarixini və mədəniyyətini əks etdirir.