Əncir həm bol kölgə verən tacı, həm də şirin meyvələri ilə bağ sahiblərinin ən çox seçdiyi ağaclardan biridir. Lakin mütəxəssislər xəbərdarlıq edirlər ki, bu ağacı evin və digər tikililərin yaxınlığında əkmək ciddi problemlərə səbəb ola bilər.
Lent.az xəbər verir ki, mütəxəssislərin bildirdiyinə görə, əncir ağacının əsas təhlükəsi onun güclü və geniş yayılan kök sistemidir.
Kök daim rütubət axtardığı üçün torpağın altında uzun məsafələr qət edə bilir. Əgər ağac evə çox yaxın əkilərsə, köklər beton və ya bünövrədəki xırda çatlara daxil olaraq zamanla onları genişləndirə və tikilinin dayanıqlılığına mənfi təsir göstərə bilər. Xüsusilə rütubətli torpaqlarda bu risk daha yüksək hesab olunur.
Bundan başqa, əncirin kökləri yeraltı su və kanalizasiya xətlərinə də çata bilər. Boruların ətrafına yayılan köklər zaman keçdikcə onları sıxaraq zədələyə, tıxanmaya və bahalı təmir işlərinə səbəb ola bilər.
Ənciri harada əkmək daha məqsədəuyğundur?
Bağçılıq üzrə mütəxəssislər əncir ağacının bağın kənar hissəsində, evdən, hasardan, bünövrədən və yeraltı kommunikasiya xətlərindən kifayət qədər uzaq məsafədə əkilməsini tövsiyə edirlər. Belə olduqda həm ağac rahat inkişaf edir, həm də tikililər üçün risk yaratmır.
Xalq arasında yayılan inamlar
Bəzi bölgələrdə qədimdən belə bir inam mövcuddur ki, həyətin içərisində, xüsusilə evə yaxın əkilən əncir ağacı ailəyə narahatlıq gətirə bilər. Bunun elmi sübutu yoxdur. Mütəxəssislər bildirirlər ki, bu cür inancların yaranmasının əsas səbəbi ağacın həqiqətən də çox güclü və aqressiv kök sisteminə malik olmasıdır. Yəni zamanla xalq arasında formalaşan bu fikir daha çox praktiki müşahidələrdən qaynaqlanır.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
