Qab yuduqdan sonra onları axar su ilə yaxşıca yaxalamaq əksər insanlar üçün adi vərdişdir. Lakin Almaniyada bir çox ailə bu mərhələni tamamilə ötürür. Yerli sakinlər qabları yuyucu vasitə əlavə edilmiş su ilə yuduqdan sonra onları birbaşa quruducuya düzür və əlavə yaxalama etmirlər.
Bu yanaşma ilk baxışdan qəribə görünsə də, Almaniyada uzun illərdir gündəlik məişət vərdişinə çevrilib.
Niyə alman evdar qadınları qabları yaxalamır?
Lent.az xarici mediaya istinadla xəbər verir ki, bunun əsas səbəbi suya qənaət etməkdir.
Almaniyada təbii ehtiyatlardan səmərəli istifadə gündəlik həyatın vacib prinsiplərindən biri hesab olunur. Mütəxəssislərin fikrincə, qabların axar su altında əlavə yaxalanması gün ərzində onlarla litr su sərf edilməsinə səbəb ola bilər. Bu rəqəm ay və il ərzində kifayət qədər böyük həcmə çatır.
Məhz buna görə də bir çox alman ailəsi əlavə yaxalama mərhələsindən imtina edərək həm su sərfiyyatını, həm də kommunal xərclərini azaltmağa çalışır.
Müasir yuyucu vasitələr iz buraxmır
Bu üsulun geniş yayılmasının digər səbəbi müasir qab yuyucu vasitələrinin tərkibidir. Yeni nəsil məhsullar elə hazırlanır ki, az miqdarda istifadə olunduqda quruduqdan sonra qabların üzərində nəzərəçarpacaq iz qoymur.
Qablar sadəcə quruducuya yerləşdirilir və üzərində qalan su damcıları, eləcə də çox az miqdarda köpük təbii şəkildə axaraq quruyur. Nəticədə boşqablar, stəkanlar və digər qablar təmiz və parlaq görünür.
Bu üsul vaxta da qənaət edir
Sürətli həyat tərzi insanları ev işlərini daha praktik şəkildə yerinə yetirməyə sövq edir. Qabları əlavə yaxalamamaq yuma prosesini xeyli qısaldır. Xüsusilə ailə yeməklərindən və ya qonaqlıqdan sonra çoxlu sayda qab yumaq lazım gəldikdə bu fərq daha aydın hiss olunur.
Bu sağlamlıq üçün təhlükəlidirmi?
Mütəxəssislər bildirirlər ki, burada əsas məsələ yuyucu vasitədən düzgün istifadə edilməsidir. Əgər vasitə təlimata uyğun miqdarda istifadə olunarsa, qabların üzərində qalan qalıqlar çox cüzi olur.
Bununla belə, allergiyaya meyilli şəxslərə, həssas insanlara, eləcə də körpələrin qabları və yemək hazırlamaq üçün istifadə olunan mətbəx ləvazimatları üçün əlavə olaraq təmiz su ilə yaxalama tövsiyə edilir.
Qabların təmiz qalması üçün başqa nələr etmək lazımdır?
Alman evdar qadınları mətbəx süngərlərini və dəsmalları mütəmadi dəyişməyi məsləhət görürlər. Çünki bu əşyalar bakteriyaların çoxaldığı əsas yerlərdən hesab olunur.
Bundan əlavə, çirkli qabları uzun müddət çanaqda saxlamamaq və quruducunu da vaxtaşırı təmizləmək vacib sayılır.
Onların tez-tez istifadə etdiyi digər üsul isə qabları yeməkdən dərhal sonra yumaqdır. Bu zaman qida qalıqları qurumur və qabları təmizləmək daha asan başa gəlir.
Bu üsul hər kəs üçün uyğun deyil
Almaniyada geniş yayılsa da, bir çox insan hələ də ənənəvi qaydada qabları yuduqdan sonra axar su ilə yaxalamağa üstünlük verir. Bəziləri bunu sadəcə vərdiş kimi qəbul edir, digərləri isə yalnız bu halda qabların tam təmiz olduğuna əmin olur.
Mütəxəssislər vurğulayırlar ki, istifadə olunan suyun keyfiyyəti, qab yuyucu vasitənin tərkibi və insanların şəxsi seçimləri hansı üsulun daha uyğun olacağını müəyyən edən əsas amillərdir.
Bizi Telegram-da izləyin
t.me/lent_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
