Madonna çimərlikdə 1,6 milyon insana pulsuz konsert verdi

Bu günlərdə 65 yaşlı müğənni Madonna Rio-de-Janeyroda pulsuz konsert verib.

Lent.az-ın xarici mediaya istinadən xəbərinə görə, məşhurun çıxışını izləməyə 1,6 milyondan çox insan gəlib. İnsanlar 4 kilometrlik Kopakabana çimərliyini doldurublar.

Rio meriyasının hesablamalarına görə, konsert şəhərin xəzinəsinə 57 milyon dollar qazandırıb. Kopakabana çimərliyində ictimai asayişi 3200 hərbçi və 1500 polis əməkdaşı qoruyub.

Madonnanın çıxışı ərəfəsində şəhərdəki otellərin 98 faizinin tamamilə dolu olduğu barədə məlumatlar əldə edilib.

Bundan başqa, yerli hava limanı mayın 1-dən dünyanın 27 şəhərindən 170 əlavə reys qəbul edib. Şəhər “Xoş gəlmisiniz, Kraliça!” yazılmış afişalarla bəzədilib.

Rio-de-Janeyro Madonnanın 2023-cü ilin oktyabrında Londonda başlayan “The Celebration Tour” adlı qastrol səfərinin sonuncu yeri olub.