NEXT qrupunda gözlənilməz hadisə baş verdi - FOTO

NEXT qrupunun heyətində dəyişiklik baş verib. Ancaq bu dəfə dəyişikliyin nəticəsi olaraq, qrupa yeni üzv qəbul olunmayıb. NEXT qrupunun mətbuat xidmətindən Lent.az-a verilən məlumata görə, üzvlərdən biri Nicat artıq qrupdakı fəaliyyətini dayandırıb. Buna səbəb isə gözlənilməz məqamların baş verməsidir: “Biz çox pis oluruq ki, bu cür hallar baş verir. Detallara aydınlıq gətirmək istəmirik, sadəcə deyə bilərik ki, bugünkü bəzi gənclər yanlış yolda irəliləməyə çalışırlar. Və bunu öz ətrafında olan kəslərə də təlqin etmək istəyirlər. Müasirliklə bu cür məqamları səhv salan gənclərə olan inamımız özünü doğrultmayanda məcburən yollarımızı ayırırıq. Nicat özünü doğrultmadığı üçün qrupdakı fəaliyyətini dayandırdıq. O, çox yaxşı bilir ki, bu tip insanlara bizim heyətimizdə yer ola bilməz”.

Məlumata görə, üzvlərdən birinin sayı azalsa da, bu, qrupun trio şəklində fəaliyyət göstərməsinə səbəb olmayacaq: “Belə ki, qrupun keçmiş üzvü və bir müddət öncə səhhətindəki problemlərə görə, NEXT-dən çıxan Əli artıq yenidən qrupa qayıdıb. Dünən isə qrup bu dördlüklə xeyli fasilədən sonra ilk dəfə efirə çıxıb”.

Xatırladaq ki, bir müddət öncə qrupda fəaliyyət göstərən müğənni Arzumun qardaşı Əli səhhətində yaranan müəyyən problemlərə görə qrupdan uzaqlaşmışdı. Əvəzində isə Nicat Əmirzadə qrupda çıxış edirdi.

Banu