Məşhur aktyor qanundankənar övladı olduğunu etiraf etdi

Lent.az-ın “Los Angeles Times” qəzetinə istinadən verdiyi məlumata görə, Arnold Şvartsnegger Kaliforniya ştatının qubernatoru postunu tərk edəndən sonra həyat yoldaşına nikahdan kənar övladı olduğunu söyləyib və bu, cütlüyün boşanmasına yol açıb.

Uşağın anası Arnold Şvartsnegger və Mariya Şrayverin malikanəsində 20 il xidmətçi kimi çalışıb və 2011-ci ilin yanvarında işdən azad olunub. Hazırda aktyorun nikahdan kənar dünyaya gəlmiş oğlunun 10 yaşı var.

Xatırladaq ki, Aronold Şvartsnegger və Mariya Şrayver 1977-ci ildə tanış olub, 1986-cı ildə ailə qurublar. Cütlüyün 2 oğlu və 2 qızı var. Bu il mayın əvvəlində cütlük boşandıqlarını elan ediblər. Onların bundan əvvəl də bir müddətdir ki, bir yerdə yaşamadıqları bildirilir.

Arnold Şvartsnegger “Los Angeles Times” qəzetinə müsahibəsində deyib ki, üzr istəməsinə ehtiyac yoxdur: “Yalnız yaxınlarıma əzab verdiyim üçün günahkaram. Artıq Mariya və uşaqlarımdan üzr istəmişəm. Mən həqiqətən təəssüflənirəm”.