“Eurovison-2011” təmsilçilərimiz bu gün yarımfinalda çıxış edəcək

Bu gün Azərbaycanın “Eurovision-2011” mahnı müsabiqəsindəki təmsilçiləri Eldar Qasımov və Nigar Camal Düsseldorfda keçirilən yarımfinalda çıxış edəcəklər.

Lent.az-ın məlumatına görə, təmsilçilərimiz 18-ci sırada səhnəyə çıxacaqlar. Duetimiz isveçli müəlliflərə məxsus olan “Running Scared” mahnısını ifa edəcək.

I yarımfinalda 19 ölkə - Albaniya, Ermənistan, Finlandiya, Gürcüstan, Norveç, Polşa, Rusiya, Serbiya, İsveçrə, Türkiyə, Azərbaycan, Xorvatiya, Yunanıstan, Macarıstan, İslandiya, Litva, Malta, Portuqaliya, San-Marino final uğrunda yarışacaq. 19 ölkədən cəmi 10-u mayın 14-də keçiriləcək final mərhələsində iştirak hüququ qazanacaq. Səsvermə həm tamaşaçılar, həm də münsiflər tərəfindən olacaq. Eyni zamanda bu il səsvermənin teleqraf əsasında keçirilməsi də planlaşdırılıb.

Qeyd edək ki, bu səsvermə sistemi müsabiqədə yenilik sayılır.

Lalə Yusifqızı