Azərbaycan “Eurovision-2011”in mayın 10-da keçiriləcək I yarımfinalında yarışacaq

APA-nın məlumatına görə, bu gün Düsseldorfda keçirilən püşkatma mərasimində müsabiqənin yarımfinallarında çıxış edəcək 38 ölkənin hansı yarımfinalda çıxış edəcəyi məlum olub. Püşkatmanın nəticələrinə görə, mayın 10-da keçiriləcək I yarımfinalda Azərbaycan, Albaniya, Finlandiya, Macarıstan, Litva, İsveçrə, Norveç, Gürcüstan, Türkiyə, Malta, Xorvatiya, San-Marino, Serbiya, Rusiya, İslandiya, Yunanıstan, Portuqaliya, Polşa və Ermənistan yarışacaq.

Mayın 12-də keçiriləcək II yarımfinalda isə İsrail, Makedoniya, Danimarka, Belarus, Niderland, Bolqarıstan, Latviya, Bosniya və Hersoqovina, Ukrayna, Kipr, Estoniya, Rumıniya, Avstriya, Sloveniya, İsveç, Moldova, Belçika, İrlandiya və Slovakiya mayın 14-də keçiriləcək finala vəsiqə qazanmaq uğrunda mübarizə aparacaq. Hər yarımfinalda 19 ölkə yarışacaq. Hər yarımfinaldan 10 ölkə finalda çıxış etmək şansı qazanacaq.

Böyük beşliyə daxil olan Fransa, Böyük Britaniya, Almaniya, İtaliya və İspaniya isə mayın 14-də keçiriləcək final mərhələsində birbaşa çıxış edəcək. Böyük Britaniya və İspaniya ilk yarımfinalı izləyə və səs verə, Fransa, Almaniya, İtaliya isə II yarımfinalı izləyə və səs verə biləcək.

Qeyd edək ki, bu ilin mayında Düsseldorfda keçiriləcək “Eurovision-2011” müsabiqəsi “Düsseldorf Arena”da baş tutacaq. Ümumilikdə builki müsabiqədə 43 ölkə təmsil olunacaq.