İlqar Xəyal: “Mühəndis kimi görsəniz, heyrətlənməyin...”
09 iyul 2010 13:30 (UTC +04:00)

İlqar Xəyal: “Mühəndis kimi görsəniz, heyrətlənməyin...”

Toy məclislərinə çağırılmadı, idman proqramı aparıcısı oldu...

90-cu illərdə populyarliğının pik nöqtəsində olan “Karvan” qrupunun eks-solisti İlqar Xəyal bu günlərdə özünü fərqli obrazda nümayiş etdirir. Lent.az-ın məlumatına görə, müğənni hazırda Azərbaycan Dövlət Televiziyasının “İdman Azərbaycan” telekanalında “Çempionlar klubu” əyləncəli televiktorinasına aparıcılıq edir.

Sənətçiyə yaxın olan şəxslərdən birinin məlumatına görə, son vaxtlar müğənnilikdən çox aparıcılığa üstünlük verən İlqar Xəyalın bu qərarına səbəb toy məclisləri və şou-proqramlara az dəvət olunması ilə bağlıdır.

Müğənni özü sənətini ikinci plana keçirmədiyin vurğulayıb: “Ola bilər ki, tamaşaçılar məni daha çox efirdə gördükləri üçün onlarda belə fikir formalaşıb ki, yaradıcılığımı sırf teleaparıcılığa yönəltmişəm. Yeni-yeni mahnılar da yazdırıram, korporativ gecələrdə də çıxış edirəm”.

Müğənninin indiyə qədər üzə çıxarmadığı başqa qabiliyyətləri də var imiş: “Natamam musiqi təhsili ilə bərabər, həm də Texniki Universitetin məzunuyam. Texnikadan çox yaxşı başım çıxır. Bəlkə də çoxları bu açıqlamamı oxuyub, təəccüblənəcək. İnanın, məişət cihazlarından tutmuş, texniki avadanlığa qədər hər şeyi təmir edə bilərəm. Bunu ona görə dedim ki, nə vaxtsa İlqar Xəyalı mühəndis kimi də görsəniz, heyrətlənməyin. Bir sözlə, pərəstişkarlarımı öz bacarıqlarımla hələ təəccübləndirməyə davam edəcəyəm”.

Nəzrin
# 460

Oxşar yazılar